Naturen treng meir demokrati – ikkje mindre

Klima- og naturkrisa er global, og ho rammar urettferdig. Dei fattigaste betaler prisen. Dei rikaste slepp billeg unna – samstundes som dei står for mesteparten av utsleppa og tener på avskoging. Difor er klima- og naturkampen også ein kamp mot ulikskap og for meir demokrati.

I møte med klimakrisa treng vi politisk handlekraft, folkestyre og tillit. Difor er det alvorleg når regjeringa no har vedteke endringar som svekkjer den demokratiske kontrollen over store naturinngrep. Framover skal NVE kunne fatta vedtak om kraftliner, vasskraft og inngrep i verna vassdrag – utan at folkevalde organ har siste ordet. Det gjer lokalsamfunn makteslause og byggjer politikarforakt.

Naturen si røyst skal ikkje teiast

Statnett planlegg kraftliner gjennom Nordhordland – over myrer, fjell og verdifulle naturområde. Lokalsamfunn og kommunar må bli høyrde, ikkje overkøyrde. Vi meiner natur og miljø må få tyngre plass i planprosessane – ikkje mindre.

Nettopp difor reagerte vi sterkt på energiminister Aasland sine uttalar etter folkerøystinga i Modalen. Over 70 % sa nei til vindturbinar i fjella, og naturvernorganisasjonar hadde vore aktive i debatten. I etterkant uttrykte energiminister Aasland at dette engasjementet ikkje var «demokratiet verdig». Det er vi djupt usamde i.

Naturvernorganisasjonane si stemme er ikkje berre legitim – ho er ein heilt nødvendig del av demokratiet. Når store arealinngrep blir planlagde, må omsynet til natur, lokalsamfunn og miljø få like stor plass som næringsinteresser. Raudt støttar deira rett til å delta i debatten, og vi meiner det styrkjer – ikkje svekkjer – tilliten til politiske prosessar.

Klimakamp og rettferd må gå hand i hand

Vi stoppar ikkje dei menneskeskapte klimaendringane ved å byggje ned naturen. Den grøne veksten vi treng, veks ikkje på børsen – ho spirer på jorda, i skogen, på myra og i fjellet. Klimakrisa forsterkar ulikskap og urett, og det er vårt ansvar å gjenopprette balansen.

Difor kjempar vi for ei grøn omstilling som ikkje skjer på kostnad av natur, menneske eller lokaldemokrati. Vi seier nei til naturøydeleggande vindturbinar på land og til havs, nei til Hordfast og til nye oljeutlysingar. Vi seier ja til vern av fjordar og vassdrag, og til klimahandling som ikkje blir styrt av marknaden – men av folkevalde, i samspel med folk og natur. 

Raudt snur ikkje kappa etter vinden

Vi i Raudt har stått saman med miljørørsla i mange viktige kampar – frå Øyfjellet og Haramsøya til Førdefjorden og Fosen, mot naturøydeleggande kraftliner og mot Hordfast. Vi seier ja til ei rettferdig grøn omstilling som skjer i samspel med naturen, på demokratiske premissar.

Naturen og klimaet treng folk som engasjerer seg, miljø- og naturorganisasjonane – og politikarar som ikkje berre er villige til å lytte, men som faktisk også skaper handling. 

Vi lovar å sette handling framfor ord!