Kulturen vår må vera tilgjengeleg

Ope brev til

Styret for Hardanger og Voss Museum

Skredhaugen/Agatunet 25. august 2025 

Regionen vår er full av historiske kulturperler. Men tilgangen til fleire av destinasjonane har vorte mindre og mindre dei siste åra. Denne trenden må verta snudd.

Agatunet er ikkje berre eit museum, det er i tillegg ein historisk stad og eit rikt kulturminne. Skredhaugen er ei naturgjeven perle, full av kultur og historie. «Hardanger sitt svar på Astruptunet», som ein sa det.

For berre nokre få år sidan var Skredhaugen sommaropen med omvisar kvar dag. Litt etter kvart har dette vorte innsnevra, og det botna seg i år (2025). I praksis var tunet berre ope i samband med nokre få tilskipingar. I tillegg tilbaud Venelaget ekstra omvising eit par sundagar, ikkje minst med tanke på utstillaren, Bjørg Strømme. Det følest nesten som om ein har halde henne for narr, sidan tilgangen til kunsten hennar berre har vore nokre få dagar.

Agatunet merkar også sterk reduksjon i besøkstalet, frå oppimot ni tusen for nokre få år sidan til det halve i år.

Det er samanheng mellom besøk og tilbod. Hovudårsaka til nedgangen, er utan tvil manglande – eller i beste fall  sterkt redusert – marknadsføring.

For tida skjer det ein ny offensiv i arbeidet med å marknadsføra Hardanger som eit reisemål. Det vert arbeidd på fleire frontar innan reiselivsnæringa.

Mellom anna vert det konkret jobba med å få til ei båtrute heilt frå Vågen i Bergen via Flesland og inn i fjordbotnen, med to avgangar dagleg.

Skal dette og andre tiltak lukkast, må alle destinasjonane òg vera tilgjengelege.

Både toppturar, siderprodusentar og museum trekkjer folk. Kulturen og kulturminna er ein viktig del av opplevingane som Hardanger har å by på. Desse institusjonane er samstundes viktige for næringslivet. Dei er med på å byggja/stø opp om dei som til dømes driv med overnatting, matservering og siderproduksjon.

Det offentlege, mellom anna Hardanger og Voss museum, som drivar av fleire av kulturinstitusjonane, må òg vera med og halda dette oppe.

Då må det skikkeleg aktivitet og marknadsføring til. Skredhaugen må få att daglege opningstider med omvisar, i tillegg til konkrete tilskipingar. Svært mange tilreisande går tur langs Hellelandsvegen. Ved parkeringsplassen på Skredhaugen står det i år berre ein plakat, og han gjeld fjoråret!

Og som han sa, ein som såg dette: «Ingen stoppar for å gå i ein skredhaug!»

Det må lagast ei skikkeleg oppslagstavle, med god informasjon om kva Skredhaugen er. Og med plass til oppdaterte oppslag/plakatar.

Tunet er i seg sjølv ei perle, og velstelt. Bakkane er strigla og kantane pussa. Noko som vert bemerka av mange, og som styrkjer opplevinga. Dagleg er det stor trafikk og mange som går opp i tunet. Men dei møter stengde dører.

I samband med den siste tilskipinga i år vart det laga plakatar som vart sette opp på fleire strategiske stader. Det førte direkte til at det dukka opp ein sveitsisk familie og ein tysk. Ein av dei hadde gått Dronningstien, den andre hadde vore til Trolltunga. Og no ville dei ha med seg litt kultur.

Dei var imponerte og begeistra både over konserten og tunet, og fekk som ei ekstra teneste omvising i nokre av bygningane.

Den potensielle marknaden er der altså, men tilbodet må oppgraderast, opnast og marknadsførast.

Det må koma skikkelege infoskilt/oppslagstavler, både ved Skredhaugen, den «nye» Røysa på Lofthus, og ved avkøyringane frå fylkesvegen til Agatunet. Og det må lagast og setjast opp oppdaterte plakatar.

Ein bør også laga fargerike trykksaker til utsending og utdeling, saman med riselivsnæringa og dei næringsdrivande rundt fjorden.

Eigarane og Skredhaugens Venelag/Stiftinga Agatunet har saman med drivarorganisasjonen Hardanger og moss Museum ansvaret for å fortelja historia vår. Det er historia me skal byggja framtida på. Og historia vår veit me er interessant for heile landet – og utlandet med. Drifta av institusjonane er avhengig av eit venelag/ei stifting, men me er avhengige av at drivarorganisasjonen støttar opp.

Me som står bak dette brevet, vil også oppmoda eigaren om å vekkja Bu museum med bygningar og alt som var samla av Amund K. Bu – til live. Den eineståande samlinga av 1014 bringklutar må også koma fram att i dagen.

Kva med ei eiga infotavle ved parkeringsplassen på Bu?

Hansken er kasta!

Edmund Harris Utne (s)

For Skredhaugens Venelag:

Leif Øie (s), Ingebjørg Sekse (s), Jarle Aarsand(s) og Johannes H. Sekse (S)

For Stiftinga Agatunet:

Svein Naa (s) og Guttorm Rogdaberg (s)