– Serverer endeleg mat att

Vasskadar gjorde at Kafé Hjørnet i Norheimsund måtte stengja i sommar. Onsdag var kafeen i drift att.

– Me måtte stengja midt på sommaren, som er ei travel tid, og opnar om hausten, som er ei roleg tid. Eg både gler og gruar meg, og er spent på korleis det kjem til å gå, fortel dagleg leiar Solveig Helen Gjøen Mo då HF er innom torsdag.

Fekk vatnet

Kafé Hjørnet ligg i etasjen under lokala der Mathildes Pizzeria&Kjøkken AS dreiv pizzarestaurant. Då det byrja brenna i pizzarestauranten natt til 13. juli, kom vatnet frå brannsløkkinga ned i kafeen. Det skulle visa seg å ta nesten fire månader med renovering før kafeen var klar til å ta imot gjester att.

Mo fortel at lokala er sette i same stand som dei var før vasskadane. Det er bygd nytt tak, nye vegger og nytt golv. Møblar og utstyr er reinska og luktbehandla.

Noko redusert tilbod

Kafeen får eit litt redusert tilbod samanlikna med korleis det var før brannen. Den første tida vert kafeen open frå onsdag til laurdag, og middagsmenyen vert litt mindre enn den var før skadane.

– Me byrjar slik, men dersom kundegrunnlaget tilseier det, utvidar me både talet på dagar me held ope og talet på middagsrettar, fortel Mo.

Då HF snakka med Mo i 13-tida på opningsdagen, hadde nokre kundar vore innom.

– Det har ikkje vore noko storinnrykk, men i dag er det torsdag og komledag. Då plar folk koma om ettermiddagen for å eta middag, fortel Mo.