Skyhøge straumprisar kan gi stengde alpinanlegg

Høge straumprisar og fare for rasjonering kan bety kroken på døra for ei rekkje små og mellomstore skianlegg i Noreg, skriv Dagens Næringsliv.

I eit skriv sendt til statsministeren, finansministeren og kulturministeren førre veke, etterlyser bransjeorganisasjonen Norske alpinanlegg og fjelldestinasjoner tiltak frå staten. Nokre av dei største kostnadene for eit alpinanlegg er nemleg kunstsnøproduksjon, som krev store mengder straum.

– I vårt område, med dei prisane som er førespegla nå, ser vi på ei tidobling i kraftkostnadene, kanskje meir, kommande vinter, seier Odd Stensrud til Dagens Næringsliv.

Han er nestleiar i bransjeorganisasjonen og dagleg leiar i Alpinco, som eig og driftar alpinanlegga på Hafjell og Kvitfjell. For Alpinco er straumutgiftene den tredje største utgiftsposten og marginane for drift av skianlegg er allereie små, ifølgje Stensrud.

– Viss straumprisane som blir signaliserte for kommande vinter blir ein realitet, så er det heilt sikkert at det vil bety kroken på døra for fleire anlegg.

(©NPK)