Ser seg ut «oppdrettstomter» lenger inne i fjorden
Det kan koma nye oppdrettsanlegg av typen Stadion Laks nord for Utne, nord for Kinsarvik og vest for Hardangerbrua.
I alle fall ser Lingalaks AS for seg akvakulturområde der i eit innspel til Ullensvang kommune i samband med rulleringa av kommuneplanen.
Nyleg kom Bremnes Seashore AS med eit innspel om nye akvakulturområde på strekkja Herand–Utne.
Artikkelen held fram under annonsen.
Potensialet i akvakultur er stort, men for å utløysa det, trengst meir tilrettelagt areal, skriv Ole Johan Sagen på vegner av verksemda.
Sagen skriv at store delar av sjøområdet i Ullensvang kommune er kverrsette av eksisterande anlegg (i gamle Jondal kommune), eller har miljøtilhøve som er mindre eigna for oppdrett (i Sørfjorden). Sagen meiner likevel at det kan vera rom for nye akvakulturføremål i kommunen, særleg dersom anlegget har lukka eller semilukka teknologi.
Lingalaks reknar med eit potensial for det semilukka Stadion Laks-konseptet i ytre del av Sørfjorden, Samlafjorden og utover Hardangerfjorden. Areala det vert peika på, er grove i utforminga og romslege.
— Om kommunen ynskjer det, kan me spesifisera og avgrensa areala ytterlegare, anten gjennom eit nytt brev eller i møte, skriv Sagen til kommunen.
Ein del av framtida for eksisterande anlegg er å elektrifisere drifta. Det er difor viktig at planen for sjøområda opnar for å kunna etablera slik infrastruktur, uavhengig av arealføremål, skriv Lingalaks i innspelet.
Oppdrettsverksemda eig 50 prosent av aksjane i Stadion Laks AS.
