Meir pengar til NVEs flaum- og skredsikringstiltak
Stortinget har vedtatt ei ekstraløyving på 100 millionar kroner til Noregs vassdrags- og energidirektorat. Pengane vil bli brukt til prosjekt som raskt kan setjast i gang mot flaumskadar, kvikkleireskred og jordskred, over heile landet.
– Det er svært bra at NVE no kan gå i gang med viktige sikringstiltak fleire stader i landet. Den auka løyvinga set oss i stand til å skunde på fleire prosjekt. I tillegg vil dette arbeidet skape sysselsetjing og aktivitet, noko som er viktig i den krevjande økonomiske situasjonen vi står i som ein følgje av koronaviruset, seier olje- og energiminister Tina Bru.
– Vi er glade for denne moglegheita til å kunne prioritere fleire sikringstiltak med stor samfunnsnytte. Ekstramidlane vil gå til å gjennomføre tiltak som kan setjast i gang raskt, i tillegg til å halde oppe framdrift på store prosjekt som er i gang. Mesteparten av arbeidet vil bli utført i 2020, seier vassdrags- og energidirektør Kjetil Lund i NVE.
