Norheimsund best i lokaloppgjer

Gjestene frå Norheimsund kunne smila breiast etter at G13-laga til Øystese fotball og Norheimsund fotballklubb barka saman tysdag.

Norheimsund leia 3–0 til pause. I den andre omgangen greidde Øystese å redusera til 1–3 før Norheimsund skåra tre mål, slik at kampen enda 6–1.

– Ingenting klaffa

Trym Sandven og Andreas Henriksen Cats trenar heimelaget.

– Dette var ein kamp me tapte i den første omgangen. Ingenting klaffa, me tapte duellane og pasningane gjekk i hytt og pine. Det vart rett og slett litt for høgt tempo med tanke på ferdigheitene til spelarane, seier Sandven.

– I den andre omgangen la me om og pressa høgare. Det gav resultat og me kjempa inn ei utlikning, men så punkterte dei kampen mot slutten av omgangen, seier Cats.

Jan Kåre Magnussen og Knut Olav Berg trenar G13-laget til Norheimsund.

– Me kom godt i gang og hadde full kontroll i 1.-omgangen. Øystese skapte vel éin sjanse, medan me skapte fleire og skåra tre mål. I den andre omgangen mista me litt kontrollen på kampen, før me jobba oss inn att i kampen mot slutten av 2. omgang. Eg vil seia at me dominerte tre firedelar av kampen, seier Berg.

– Betyr litt ekstra

Spelarane på dei to laga er elevar ved Kvam ungdomsskule, og mange av spelarane opplevde at klassekameratar og gode vener stod på den andre banehalvdelen.

– Det vert litt ekstra tenning når spelarane går på skule saman. Me merka då me kom inn i garderoben før kampen at spelarane hadde tenkt å bita frå seg i duellane, seier Cats.

Norheimsundspelarane Brynjolf Lid og Johannes Valland Lyngset innrømmer at det er spesielt å måla krefter med klassekameratar.

– Det er eigentleg kjekt å spela mot spelarar som me kjenner godt. Det vert ekstra mykje innsats og ekstra mange taklingar. Det er ganske kjekt å vinna mot Øystese. Då kan me skryta når me kjem på skulen neste dag, seier Lyngset.

– Likevel vert ein ikkje så lei seg om ein tapar når det er kompisar ein spelar mot, seier Lid.

– Ein vert heller ikkje så sur når ein får ei stygg takling mot seg. Ein vert sintare om ein vert takla stygt av ein spelar frå eit lag frå Bergen, seier Lyngset.

God haust

For G13-laga er sesongen delt i ein vårserie og ein haustserie. Øystese og Norheimsund spela i 2. divisjon i vår. Begge laga hadde ein strålande vår. Norheimsund vann avdelinga, medan Øystese tok 2.-plassen. Dermed rykte begge laga opp til 1. divisjon i haust. Lokaloppgjeret var den siste serie-kampen i år. Norheimsund enda på 2.-plass i 1. divisjon, avdeling 2, medan Øystese kom på 8. -plass. Avdelinga har ti lag.

– Me er nøgde med hausten. Me var litt spente på korleis det skulle gå etter opprykket. Det har gått over all forventing, seier Magnussen.