Men kva med landbruket, det er jo ein viktig del for vår vesle kommune!

DD. MM. kong Harald og dronning Sonja besøkte Jondal tysdag 18. juni 2019. Rundt klokka 10 blei kongeparet tekne imot på gjestebrygga av Torkjell Tolo. På gjestebrygga spelte Herand musikklag, og blomsterborna Jarand Selsvik og Julia Midtun tok varmt imot kongeparet med blomar. Vidare møtte fylkesmann Lars Sponheim, ordførar Jon Larsgard og politimeister Kaare Songstad.

Det neste på programmet var avreise mot Juklafjord friluftsområde. Etter framkomst følgde ordføraren kongeparet til buer som representert lokalt næringsliv, matproduksjon, industri, reiseliv og båtbyggjarhistorie. Buene var flotte og godt framstilt.

Noko eg merka meg var at det ikkje var nokon representasjon av det lokale landbruket i kommunen. I Jondal er landbruk ein viktig og stor del av næringa.

I Hordaland Folkeblad 20. februar 2019 var det trykt ein artikkel som omhandla at mjølkebønder produserer mest. I Jondal var bruttoproduktet i jordbruket 16,1 millionar kroner. Også der bidrog mjølkeproduksjonen desidert mest, med 13 millionar kroner. Det heldt til ein 9.-plass i fylket. Sauedrift bidrog med 1,9 millionar kroner. Det vart produsert frukt og bær for 1,1 millionar kroner, noko som gjev Jondal 5.-plass i fylket i kategorien. Bruttoproduktet i skogbruket i Jondal var på 2,5 millionar kroner.

Jondal er ein liten kommune, men har hatt ein liten auke i bruttoproduktet i jordbruket frå 2007. Det var i 2016 48 årsverk i jordbruket, noko som utgjorde 5,7 prosent av bruttoproduktet i kommunen, ifølgje Kjetil Mehl, leiar i fylkesstyret i Hordaland bondelag.

I den siste tida har Jondal Kommune satsa mykje på fornying og mjølkeproduksjon. På landsbasis har talet på mjølkekyr som går i lausdrift økt frå 49 til 55 prosent på tre år. Uansett auking er det framleis nesten to av tre norske mjølkefjøs båsar og ikkje lausdrift, dette viser tal frå Tine. I Jondal kommune, særleg i Krossdalen, er det eit godt jordbruksmiljø. For tida skjer det mykje rundt landbruket i Krossdalen. I kommunestyret i februar vart det samrøysta eit vedtak om å dela ut pengar frå næringsfondet til mjølkerobot og fire driftsbygningar til fem søkarar. Det er fornying og utbygging, der kommunen har gjeve investeringstilskot til dei som byggjer ut for mjølkeproduksjon.

Mjølkeproduksjonen har stått sterkt i Jondal kommune og den står sterkt mot framtida. Det eg gjer meg tankar om er at landbruket burde ha vore representert under konge- og dronningbesøket, med tanke på verdien og betydinga landbruket har for lokal og nasjonal historie, næring og identitet i kommunen.

Eg tenker sidan Jondal kommune er ein liten jordbrukskommune, og dermed ligg på 9.-plass i hordalandsmålestokk, er jordbruket ei viktig næring for vår vesle kommune.

Silje-Margrete Fjærtoft

Leiar i Ullensvang Senterungdom