– Me vil ikkje ha det spanande. Me vil vinna!

Om lag 350 personar var samla i idrettshallen i Øystese fredag kveld. Sørvik likte ikkje valet landslagstrenar Ståle Solbakken gjorde då han bytte nesten heile det norske laget til kampen.

– Det minner om barnefotball. Alle må få spela. Hiv innpå dei som er betre! seier ho engasjert halvvegs ut i 1. omgang.

Sørvik hadde bord i VIP-avdelinga saman med familie og vener. Mor til sambuaren, Øystein Olsen, hadde bursdag.

– Ei perfekt bursdagsfeiring, seier Sørvik.

– Vert overkøyrde

Bursdagsbarnet, Magreth Børve Olsen, meiner feiringa vert perfekt om Noreg skårar minst eitt mål til.

– Det er spanande, men eg reknar med at me vert overkøyrde. Eg trur det vert 4–1 til Frankrike, seier Øystein.

Han fekk rett. Frankrike leia lenge 3–1, men på overtid sette laget endå ein ball i nettet.

Øystein har sett seks–sju kampar så langt i VM. Den fyrste norske kampen var dårleg. Den andre kampen mot Senegal var betre, meiner han.

– Me har vunne! Ikkje sit her og klag! skyt Sørvik inn.

Paret er samd om at kamp på storskjerm i idrettshallen er ei suksessoppskrift.

– Må støtta Noreg

Anna Flotve og Eline Bekkesletten var på plass i hallen for å oppleva den gode stemninga. Heile venegjengen frå vidaregåande var på plass og sat samla rundt eit bord.

– Det er kjekt å samlast. Me plar gjera det når det skjer noko i bygda, seier Flotve.

– Me må støtta Noreg, seier Bekkesletten.

Kvinnene har fylgt med på landslaget ei stund. Flotve fylgjer også med på engelsk fotball, særleg Liverpool. Ho fortel at ho har spela fotball sjølv, og seier det er kjekt å sjå at spelet er godt. Fotball gjev glede sjølv om ein ikkje spelar sjølv, meiner ho.

Bekkesletten har fått med seg dei norske VM-kampane, og har sett nokre av dei svenske. Ho meiner det er vanskeleg å seia kor langt Noreg kjem i meisterskapen, og vil ikkje «jinxa» resultatet.

– Eg trur dei kjem til åttedelsfinale, seier Flotve.

Ho forstod bakgrunnen for laguttaket til kampen, og meiner spelarane er gode nok uansett. Dessutan meiner ho det er bra at dei beste spelarane får kvila. Bekkesletten ville heller hatt dei beste på banen også i denne kampen. 

– Me må gjera det me kan for å vinna, seier ho.

– Om me tapar, er me framleis vidare, seier Flotve.

Kampen mellom Noreg og Irak vart vist i Holmatun. Bekkesletten seier stemninga der var god. Det var lett å halda seg vaken, seier ho. Difor gledde ho seg til å sjå kampen i idrettshallen.

På kamp åleine

Ved eit anna bord sat Frøya Hveding. Ho kjem frå Storjord i Nordland og har sommarjobb hjå Elkem Bjølvefossen. For å verta kjend med bygda kjøpte ho billett til arrangementet og reiste på kamp åleine.

– Det er kjekt å koma seg ut litt, seier Hveding.

Då ho kom inn i idrettshallen, sette ho seg ved eit tilfeldig bord. Der kom ho i snakk mellom andre med Sebastian Skaar frå Øystese.

– Du sette deg ved rett bord! seier Skaar til Hveding.

Han var i hallen med fleire gamle klassekameratar frå ungdomsskulen. Han såg sin sjuande VM-kamp. Mellom anna hadde han fått med seg oppgjeret mellom Sverige og Nederland. Det var ein stor skuffelse, seier han. Også laguttaket til fredagskampen var han skuffa over.

– Det er dumt å ha Haaland og Ødegaard på benken. Eg er redd det vert ein dårleg start. Dei kjem sikkert innpå til slutt, for dei kan ikkje sitja på benken heile kampen, seier han.

Deogracias Mukula er student i Trondheim. Han skal verta trafikklærar. Han skildrar stemninga i hallen som heilt herleg. At han enda opp på kamp, var litt tilfeldig.

– Alle karane sa at det var her det skjedde, seier han.

– Litt B-prega

Menn og kvinner i alle aldrar var til stades i idrettshallen. Fleire hadde fotballdrakt i norske fargar, andre hadde teke med flagg og skjerf. Nokre hadde ansiktsmåling. Allereie få sekund etter at kampen var i gang, kom den fyrste norske sjansen. Jubelen braut laus, men ebba ut då ballen ikkje gjekk i mål.

Augo på dei frammøtte var klistra til skjermen. Nokre sat heilt på kanten av stolen. Andre hoppa opp og fekta med armane mot skjermen.

Rundt eit bord sat mellom andre Bjørn Christian Laupsa, Knut Njaa og Merete og Tore Tellevik. Laupsa seier det er kjekkare å sjå fotball saman med andre enn heime åleine.

Ingen av dei kunne svara på kven favorittspelaren på det norske laget er.

– Det er berre favorittar. Laget i dag er litt B-prega, men det er mange gode spelarar, så det kan bli bra, seier Laupsa.

– Mange trøytte tryne

Merete fortel at ho har fått med seg dei norske kampane, og at ho ser éin til to VM-kampar kvar dag. Ho sat oppe for å få med seg nattekampen mellom Noreg og Senegal.

– Eg var flink og la meg tidleg. Så la eg meg att etterpå, så det gjekk greitt. Men det var mange trøytte tryne dagen etterpå, seier ho.

Merete skryter av landslaget. Spelet er fantastisk, laget er solid og mange spelarar er gode, oppsummerer ho.

– Me skal vera glade om me klarar uavgjort med denne startoppstillinga, seier Tellevik.

– Eg vert ikkje overraska om Frankrike vinn, viss me skal vera litt realistiske, seier Njaa.

– Nusa er best

Etter litt diskusjon i gruppa vart gjengen einige om at Antonio Nusa er den beste landslagsspelaren.

– Han er kjapp som berre det, seier Njaa.

Tellevik vil helst berre nemna gode Liverpool-spelarar. Sidan ingen frå det laget er å finna på det norske landslaget, er han samd i at Nusa gjer ein god jobb for Noreg.

Laupsa spår at det kjem til å ta 17 minutt før det fyrste målet i kampen kjem. Ein annan meiner det er realistisk at den fyrste skåringa skjer etter 12 minutt.

Allereie sju minutt inn i kampen hadde Ousmane Dembélé sett ballen i mål for franskmennene. Då vart det stille i idrettshallen. Den høglydte stemninga som oppstod då nasjonalsongen vart spela før kampen starta, vart erstatta av ro.

– Det går dårleg, sa Skaar om stemninga.

13 minutt seinare skåra Dembélé endå ein gong. Eitt minutt seinare sette Thelo Aasgaard ballen i nettet for Noreg. Då vart det jubel i hallen. Om lag ein halvtime inn i 1. omgang sette Dembélé inn sitt tredje mål, før han på overtid avslutta det heile med sitt fjerde mål for dagen.