Bjørnar Sandnes Lillefosse sikra seg to NM-gull på to dagar. Foto: Vestpress

Lillefosse tok to NM-gull

Med ein margin på 1 sekund sikra Bjørnar Sandnes Lillefosse sigeren i NM i terrengløp laurdag. Sundag fylgde han opp med stafettsiger.

— To NM-gull heng høgt. Eg er veldig nøgd, seier Lillefosse.

Gular-løparen frå Strandebarm fullførte den individuelle tevlinga på 9.19 minutt. Even Brøndbo Dahl frå FIK Orion på 2.-plass bruka 9.20 på den 3 kilometer lange løypa i Bergen. 24 personar deltok i tevlinga.

— God kontroll

29-åringen bestemte seg for å liggja langt framme og vera klar dersom nokon sette opp farten. Etter halvannan runde kjende han at han framleis hadde mykje å gå på.

— Siste halvdelen sprang eg i front og styrte farten. Eg venta på at nokon skulle klinka til, men det skjedde ikkje. Eg hadde ein kar rett bak meg, men eg kjende at eg hadde god kontroll, seier Lillefosse.

Ekstra moro var det at NM føregjekk på det som no er heimebana til Lillefosse i Bergen.

Sundag vann han og Marius Vedvik stafetten for det eine Gular-laget. Vedvik vart nummer tre laurdag, og karane var soleklare favorittar før start. Dei var ikkje samde om taktikken, men enda med å fylgja forslaget til Vedvik — jamn og god fart frå start. Det fungerte bra og dei hadde god kontroll.

— Me fekk ei luke på rundt fire sekund på min fyrste etappe. Etter det auka me luka litt og litt, seier Lillefosse.

— Brukbar sesong

Kvemmingen starta innandørssesongen bra i vinter med personlege rekordar og EM. Då utesesongen byrja, gjekk det ikkje like lett.

— Fyrst vart eg forkjølt, så måtte eg operera ei visdomstann og så fekk eg ein muskelskade i sete. Det var mykje småplukk, og eg mista dei fyrste løpa, seier Lillefosse.

Det hindra han likevel ikkje i å setja nye rekordar.

Artikkelen held fram under annonsen.

— Eg har fått ny pers på 3.000 meter både inne og ute. Såleis har det vore ein brukbar, men ikkje perfekt sesong, seier Lillefosse.

Neste helg er det NM i terreng (lang løype, journ. merknad) i Oslo. Lillefosse er påmeld, og stiller om beina kjennest bra.

— Så får eg sjå om eg klarar å gjenta resultatet. Eg går i alle fall for pallplass. Medalje er bra, og gull er stong inn, seier Lillefosse.

Til neste år siktar han seg inn på EM utandørs.