Knepent tap i semifinale

Hardanger bordtennisklubb (HB) møtte onsdag Stord i semifinale i sluttspelet i eliteserien. Kampen vart spela i Gamlehallen i Vikahaugane idrettspark på Stord, og heimelaget vann 5–4.

HB stilte med Roger Andersson, Thomas Låte, Jan Roger Andersson og Jack Feng. Sigrane kom kom ved Roger Andersson (2), Låte og Jan Roger Andersson. Andersson senior vann dermed begge kampane i A-lagskamp nummer 50 for HB, skriv sportsleg leiar Håvard Markhus.

Dermed vann serietoar Stord 5–4 mot seriefirar HB, og det vert Stord som skal møta Laksevåg i finalen i sluttspelet.

HB er uansett svært godt nøgd med sesongen.

– Etter opprykk tre sesongar på rad har me gjennomført ein svært god debutsesong i eliteserien, skriv Markhus.

Målet før sesongen var å unngå nedrykk. HB enda på 4.-plass i grunnspelet og kvalifiserte seg til sluttspelet.

– Etter tap i semifinalen vart me nummer 3 i sluttspelet, og kunne ta imot bronsemedaljar, pokal og pengepremie, skriv Markhus.