BUA er i gang: – Fantastisk
Det som på folkemunne truleg kjem til å heita «Røde Kors-huset» ei tid til, kan no like gjerne kallast BUA-huset. No rår nemleg den nasjonale utlånsordninga grunnen i det store, gule og no også kommunale huset like ved fylkesvegen i Øystese.
Hyller med mellom anna akematter, skeiser, skisko, alpinbriller, og stativ med ski og stavar i ymse variantar er å finna i det store opphaldsrommet i den fyrste høgda. Seinare vil utvalet truleg verta supplert med utstyr til friluftsliv og bading på sommaren. Utstyret kan gjennom BUA-appen reserverast inntil to veker på førehand og lånast i inntil sju dagar. Både privatpersonar, skular og barnehagar kan nytta ordninga.
Og om ingen andre har reservert det når dei sju dagane har gått, og det elles finst rikeleg med tilsvarande utstyr, burde det ikkje vera noko problem å lengja lånetida, fortel fritidskoordinator Kristin Lundblad i Kvam herad.