Bergtun vann noregscuprenn

Skiskyttar Malin Auganæs Bergtun gjorde det heilt store og vann noregscuprennet på Lygna i helga.

Kvemmingen trefte med 18 av 20 skot i normalrennet laurdag, og det heldt til siger i klassen for 20–21 år gamle kvinner. Marginen ned til Une Christiane Tronerud Kvelvane frå Voss var på 26 sekund. 19 fullførte rennet.

– Det er alltid kjekt å vinna, sjølvsagt. Rennet var litt spesielt, for eg kjende meg ikkje særleg god i starten. Det gjekk raskare etter kvart, seier Bergtun.

Ho vann to noregscuprenn også som 19-åring. Sundag vart kvemmingen nummer 4 i sprinten.

Bergtun kjem frå Norheimsund, men bur og studerer økonomi på snøsikre Lillehammer. Der trenar ho framleis hardt og satsar for fullt på skiskyting.

– Det er prioritet éin i dag, så får eg sjå kor lenge eg synest det er kjekt og er motivert, seier Bergtun.

Klubbveninne Kristin Sande vart nummer 9 med berre to bomskot laurdag og nummer 4 sundag. Hanna Børve, også ho frå Kvam, enda på 9.-plass i sprinten sundag i klassen for 17-åringar.