Ein mangfaldig skule for auka gjennomføring

Arbeidsmarknaden endrar seg raskt og vil gjere det same i framtida. Den vidaregåande skulen er viktig for å gi ungdomar den kompetansen som arbeidslivet etterspør. Diverre er det mange ungdomar som ikkje fullfører vidaregåande opplæring. Årsakene til dette er mange, og det er ei stor utfordring for samfunnet og den enkelte at så mange unge fell utanfor skule og arbeidsliv. Senterpartiet meiner difor det er viktig med eit mangfald av tiltak og at ein lærer av alle dei gode døma som bidreg til auka læring, meistring, trivsel og motivasjon. Det viktige er å sjå den enkelte ungdomen og behova hans eller hennar.

Med stor trong for fagarbeidarar er det viktig at fleire vel yrkesfag og at fleire får høve til fullføre yrkesfagutdanninga dei har byrja på. Det er viktig med ei rådgjevarteneste i ungdomsskulen som framsnakkar yrkesfag og moglegheitene som ligg der, teorifag må verte meir praktiske og fleire må få læreplass. Ungdomar som av ulike grunnar ikkje er klare for vidaregåande skule, må få alternative kompetansegivande tilbod, gjerne i samarbeid med NAV.

Hordaland fylkeskommune har starta to produksjonsskular for å få ungdomar som har droppa ut av vidaregåande opplæring tilbake i framtidsbyggjande aktivitet. Ideen bak tilbodet er å gi ungdomar eit praktisk læringsgrunnlag, lyst, moglegheit og kompetanse til å gjennomføre vidaregåande opplæring eller lukkast på arbeidsmarknaden. Erfaringane med Hyssingen produksjonsskole i Bergen er veldig gode. Av dei ungdomane som har gått på produksjonsskulen, er 85 % i framtidsbyggjande aktivitet. Senterpartiet i Hordaland meiner me treng fleire slike tilbod og vil jobbe for eit eige nasjonalt lovverk og ei eiga finansieringsordning.

Ei skulehelseteneste med helsesjukepleiarar og psykologar med tid til elevane, miljøarbeidarar og tilbod om skulemåltid skapar trygge og inkluderande skulemiljø for elevane. Trivsel og godt skulemiljø bidreg til auka læring og gjennomføring, og er viktig for å skape ein skule for alle. Senterpartiet ynskjer å styrkje skulehelsetenesta gjennom fleire helsesjukepleiarar, psykologteam og miljøarbeidarar i den vidaregåande skulen. Det er òg eit mål for Senterpartiet at alle vidaregåande skular har tilbod om gratis skulemåltid.

Alexander Fosse Andersen

Politisk nestleiar i

Hordaland Senterparti

6.-kandidat til fylkestingsvalet for Vestland Senterparti