Ynskjer lengre sklie i kommunalt bygg – tek rekninga sjølv

Hardangerbadet eigedom AS ynskjer ei utvida vassklie i Hardangerbadet i Øystese. Løysinga har vore arbeidd med sidan mai, og resultatet er ei løysing der stupetårnet vert tilkoma til ein høgare del av tårnet. Med ein auke i starthøgda til sklia frå 3 til 4,6 meter over vassflata kan sklielengda aukast frå 26,4 til 38 meter.

– Endringa vil gje ei langt meir spanande oppleving av sklia, skriv dagleg leiar Bjarte Rasmussen i Kvammabadet KF i eit notat.

Stupetårnet vert ein del av det kommunale føretaket sitt anlegg, men Hardangerbadet eigedom vil ta kostnaden med lenging av sklia. Kostnaden er sladda i saksutgreiinga fordi det private selskapet har bede om at talet ikkje vert offentleg kjent.

Rasmussen tilrår å akseptera endringa. Han viser til at ho vil gjera badet meir attraktivt og ikkje har økonomiske følgjer for det kommunale føretaket.

Styret skal i møtet drøfta mellom anna status i byggjeprosjektet og avtaleverk med Hardangerbadet eigedom og Hardangerbadet drift AS. Møtet i Kvam rådhus er ope.