Vil setta Ålvik på kartet med «eventyrleg» toalett
- Me trur prosjektet kan fungera som ei vitamininnsprøyting for området.
Det seier Therese Ruud, strekningsansvarleg for Nasjonal turistveg Hardanger i ei pressemelding.
Statens vegvesen har planar om å bygga eit toalett som «ingen har sett maken til før» i Tyrvefjøra.
Bygget, som framleis er på skissestadiet, skal bestå av to toalett laga av tre og betong, med eit stort tak over.
- Me ønsker å laga eit bygg som set Indre Ålvik og turistvegen i Hardanger på kartet. Prosjektet er spanande og nyskapande, seier Ruud.
Målet er å starta bygginga vinteren 2020.
Arkitektane har henta inspirasjon i den lokale naturen.
- Me ønsker å understreka dei intime og nesten hemmelege kvalitetane på staden ved å bygga toaletta som ein del av landskapet, seier Reinhard Kropf, partnar og fagleg leiar i arkitektkontoret Helen & Hard AS.
Arkitektane meiner Hardangerfjorden er unik. Dei har late seg begeistra av svaberga og dei geologiske formasjonane på tomta.