– Vi vil ha miljøvennlege snøggbåtar så snart som råd, seier fylkesordførar Jon Askeland i Vestland. Foto: Gorm Kallestad / NTB/ NPK

Vestland vil ha hybridbåtar så snart som råd

Fylkesutvalet i Vestland vedtok tysdag at ny kontrakt for sambanda mellom Sogn og Fjordane og Bergen skal legge til rette for innfasing av hybridbåtar så snart som mogleg og seinast innan utgangen av 2024.

– Vi vil ha miljøvennlege snøggbåtar så snart som råd, seier fylkesordførar Jon Askeland i Vestland eit nyheitsbrev frå Vestland fylkeskommune.

Det Fylkesutvalet no går inn for er modellalternativ B i saksførelegget. Det vart vedteke med 14 mot 3 røyster. Fylkesutvalet ber òg om at fylkesrådmannen legg til rette for utlysing av ei nullutsleppspilot. Inntil hybridbåtar kan settast i drift, har fylkesrådmannen fått fullmakt til å inngå mellombels kontrakt (anten forlenging eller ny kontrakt) for perioden mai 2022 til utgangen av 2024, med høve til å avtale opsjon på 1+1 år.

Fylkesutvalet presiserer at det er viktig at fylkeskommunen oppnår økonomisk støtte frå verkemiddelapparatet. Det er ein føresetnad at løysinga sikrar god driftstryggleik, frekvens og regularitet.

Fylkesordførar Jon Askeland er godt nøgd med vedtaket.

– Vi skal fase ut dei konvensjonelle snøggbåtane for å få ned utsleppa. Det ønskjer vi så snøgt som råd. Hybridbåtar er ei god, driftssikker og miljøvennleg løysing. Graden av hybrid skal vi kome attende til i ny sak i november. Vi har og bede om at det blir lagt til rette for utlysing av kontrakt for snøggbåtar med nullutslepp. Dette er og ei sak vi må kome attende til, seier fylkesordførar Jon Askeland.