Vasskrans flyttar avløpsleidning

Kvam herad endrar traseen for ein avløpsleidning i Movatnet etter at ein biolog har studert området.

Leidningen, som skal liggja på botnen på strekkja frå Seland til Ungdomshallen, skal erstatta ein gammal leidning frå 1970-talet som ikkje stettar moderne krav. Planen var at den nye leidningen skulle følgja om lag same trasé som den gamle.

I slutten av september var geograf og biolog Anders Lundberg på synfaring i Movatnet. Dette skjedde på oppdrag frå Kvam herad. Målet med synfaringa var å sjå om traseen heradet hadde valt, kunne skada plantelivet i området.

I rapporten skriv Lundberg at Movatnet er eit unikt naturområde. Vatnet har store, grunne brakkvassområde. Ingen andre stader på Vestlandet har ein liknande natur. I brakkvassområdet veks sjeldne og sårbare planteartar, mellom anna den raudlista planta liten vasskrans. Liten vasskrans er berre registrert éin annan stad i Vestland.

– Kan forsvinna

Lundberg fann liten vasskrans på grunt vatn på Seland, og åtvarar heradet mot å velja den planlagde traseen. Gjer ein det, kan førekomstane forsvinna. Lundberg meiner at den beste løysinga er å leggja leidningen langs hovudvegen, på innsida av huset som vert nytta av Hardanger MC-klubb.

Det neste beste alternativet er ifølgje Lundberg å leggja traseen rett nord for pumpestasjonen, parallelt med grøfta aust for campingplassen. Då vil ein unngå området der han fann liten vasskrans under synfaringa. Om ein vel denne løysinga, er det viktig at heradet ikkje legg att ein jordvoll langs traseen.

– Ein jordvoll vil vera eit springbrett for ekspansjon av tre og skog, noko som vil øydeleggja det som er att av den sårbare og sjeldne brakkvassenga, skriv Lundberg.

Vel nest beste alternativ

Prosjektleiar Erling Eid fortel at Kvam herad har valt det Lundberg meiner er den nest beste traseen.

– Ut frå alle kommunale pumpestasjonar er det i tillegg til pumpeleidningen ein overløpsleidning. Denne skal fornyast i same omgangen. Ein slik leidning treng sjølvfall frå det som er overløpsnivået i stasjonen og ut i vatnet. Skulle me gjort det biologen meiner er det beste alternativet, klarar me ikkje å få fall ut i vatnet frå den eksisterande pumpestasjonen. Ein vil også koma i konflikt med eksisterande leidningar og kablar, skriv Eid i ein e-post.

Den nye traseen inneber at heradet må søkja om dispensasjon frå landbruks-, natur- og friluftsføremålet (LNF) i kommuneplanen. Endringane medfører dessutan at ein treng om lag femti meter meir leidning.

– I utgangspunktet vert ikkje arbeidet meir omfattande enn det hadde vore slik me hadde tenkt. Noko kortare grøft på land, og noko mindre omfang av nedspylinga av leidning ute i vatnet, vil vega opp for mykje av auka leidningskostnaden, fortel Eid.

Arbeidet vert gjort når søknaden er behandla, entreprenøren har tid til å koma og vêret tillèt det.