Ullensvangarar samlast og kvemmingar sit kvar for seg neste veke
Medan Ullensvang-politikarane skal møtast fysisk, sit kvemmingane på kvart sitt nes komande veke.
Ordførar Torgeir Næss (Ap) i Kvam herad opplyser at heradsstyremøtet tysdag 23. mars vert eit nettmøte. I Ullensvang, derimot, planlegg ordførar Roald Aga Haug (Ap) eit fysisk møte i Fjordahallen i Kinsarvik, sjølv om møteplanen på den kommunale heimesida opplyser at møtet skal vera i rådhuset i Odda.
Næss viser til dei aukande smittetala i Noreg som grunnlag for avgjerda, sjølv om Kvam vel å merka ikkje har hatt mange smittetilfelle dei siste vekene. Faktisk har Ullensvang hatt fleire.
Artikkelen held fram under annonsen.
Haug opplyser at han er budd på å gjera møtet digitalt på kort varsel dersom omstenda tilseier at det er naudsynt.
Formannskapsmøtet i Kvam onsdag 17. mars, der mellom anna Hardangerbadet-saka skal drøftast, vert av det fysiske slaget i Kvam rådhus. Hovudårsaka er at Kvammabadet KF skal orientera om saka. Møtet vert kringkasta av Kvam herad via Kommune-TV.