Ukjent kor mange barn som faktisk går på skulen

Tre veker etter at skulane stengde, finst det inga oversikt over kor mange som faktisk nyttar seg av tilbodet som finst for mange barn.

1,1 million barn vart råka då skular og barnehagar stengde for tre veker sidan. Barn med foreldre i samfunnskritiske jobbar skulle derimot få halde fram. Men også elevar med vedtak om spesialundervisning og elevar med spesielle utfordringar skulle framleis ha eit tilbod. Noka oversikt over kor mange barn som får nytte seg av eit slik tilbod, finst likevel ikkje, skriv VG.

– Vi har enno ikkje eit systematisk kunnskapsgrunnlag. Hugs, dette er ein krevjande periode på alle nivå, seier direktør Hege Nilssen i Utdanningsdirektoratet til avisa.

Barneminister Kjell Ingolf Ropstad (KrF) seier han ikkje har kontroll over kor mange barn som går i dei stengde skulane. Sjølv om fylkesmennene vart bedne om å registrere dette, har påbodet berre delvis vorte følgt opp lokalt.

– Veldig ofte er det ikkje ungane som har eit problem. Det er foreldre som slit med å meistre å vere foreldre. Vi må bidra til å gi foreldre den avlastninga og hjelpa dei treng, seier Ropstad, som er oppteken av at barn med hjelpetiltak frå barnevernet skal sikrast plass sjølv om skulane og mange institusjonar er stengde.

(©NPK)