– Tunnelavgjerd hastar ikkje likevel

Brått hastar det ikkje for kvemmingane å velja kva tunnelløysing dei ynskjer, og brått skal ein eller annan kvamskogtunnel regulerast.

Det vart kjent i møtet i styringsgruppa for Kvammapakken fredag. Representantane til fylkeskommunen opplyste at Kvam herad likevel ikkje treng skunda seg for å prioritera og velja prosjekta til ein eventuell ”Kvammapakken 2”.

Ordførar Jostein Ljones (Sp) har lagt press på heradsstyret for å få teke ei lokalpolitisk avgjerd i saka før nyttår. Grunngjevinga for hastverket var at dei lokale prioriteringane måtte gjerast før arbeidet med regional transportplan byrjar etter nyttår.

Då HF snakka med Ljones fredag ettermiddag, la han ikkje skjul på at dei nye opplysingane stiller han i eit litt underleg lys.

Ingen hast lenger

Samferdsledirektør Håkon Rasmussen i fylkeskommunen seier til HF at grunnen til at tidspresset er borte at kvamskogtunnelen – anten han går under eller berre opp på Kvamskogen – vert så dyr at prosjektet må gjennom såkalla KS2, som står for kvalitetssikring av styringsunderlag og kostnadsoverslag. Kravet vert stilt til prosjekt med ein venta kostnad på over 750 millionar kroner.

Aller fyrst må prosjektet regulerast. Dessutan må det godkjennast av Stortinget. Både reguleringa og KS2-prosessen er så tidkrevjande at det vil vera snakk om årevis før det er aktuelt med bygging. Det naturlege er at Statens vegvesen regulerer tunnelen, med Kvam herad som planstyresmakt, fortel Rasmussen.

Han seier det er uvisst når og korleis valet mellom den lange tunnelen under Kvamskogen – som fylkeskommunen ikkje kan sjå er mogeleg å finansiera – og den kortare varianten forbi Tokagjelet skal gjerast. Han seier ein veg å gå kan vera via ein kommunedelplan, slik Statens vegvesen har tilrådd i forprosjektet for Tokagjelet.

– Det er uansett snakk om så lange tidsløp at det ikkje hastar. Regional transportplan (RTP) låser ikkje dei økonomiske rammene framover, og inneber ikkje stopp i alt anna arbeid, seier han.

– Vårt ynske var å få ein så konkret som mogeleg omtale av ein eventuell ny kvammapakke i RTP når denne skal på høyring på nyåret.

Manar til mindre val

Som følgje av KS2-kravet seier Rasmussen at kvemmingane i fyrste omgang kan konsentrera seg om litt mindre avgjerder. Det fyrste spørsmålet vert om berre dei påbyrja prosjekta i Kvammapakken skal fullførast, eller om ein skal utvida bompengeinnkrevjinga for å få fullført alle prosjekta i pakken. Unntaket er opprustinga ved Skeianeset mellom Ytre Ålvik og Steinstø, som vegvesenet allereie har avskrive som eit langsiktig tunnelprosjekt.

– Denne diskusjonen treng ikkje venta, seier han.

Ifølgje Rasmussen arbeider konsulent og trafikktalekspert Helge Hopen med å finna ut kva kan ein kan få ut av kroner og øre i dagens bompengepakke.

Nye premissar

Rasmussen seier fylkeskommunen må drøfta den vidare prosessen med Kvam herad og vegvesenet. Han påpeikar at det ikkje var opplagt at vegvesenet ville tilrå ein så lang tunnel at KS2-grensa vart nådd, og at det er noko av årsaka til at fylkeskommunen no skisserer andre premissar for det lokale ordskiftet i Kvam.

Tilrådinga om tunnel frå Steinsdalen til Røyrli vart offentleggjord i eit møte i Kvam formannskap 30. august. Korkje i møtet eller seinare har fylkeskommunen opplyst at tunneldebatten kan leggjast død mellombels. Det hende fyrst fredag.

– Kan verta billegare

Ordførar Ljones fortalde etter styringsgruppemøtet fredag at det no ser ut til at vegprosjektet Tolo–Nes ser ut til å verta billegare enn venta av di ein kan redusera dei uføresette kostnadene.

Rasmussen vil ikkje opplysa noko om kva summar det er snakk om, og at ein fyrst i februar vil vita korleis det endelege økonomiske resultatet vert. Førebels er det berre snakk om ein prosjektkalkyle, og desse varierer rett som det er i både positiv og negativ retning, fortel han.

Dersom det vert kroner att, kan ein bruka dei til andre prosjekt. Ljones meiner ein forenkla gang- og sykkelveg på Kvamskogen, som Kvamskogen næringslag har teke initiativ til, bør vera eit aktuelt prosjekt å spandera den resterande slanten på.

Må orientera lokalt

Ordføraren sa fredag at han planlegg eit møte for gruppeleiarane i heradsstyret denne veka for å orientera om utviklinga i saka.

I morgon kveld skal Kvam Ap ha medlemsmøte med Kvammapakken som einaste sak på agendaen. Gruppeleiar Borghild Storaas Ones opplyser at Ljones skal delta i møtet for å informera om siste nytt, slik at medlemene slepp å føra diskusjonar som er baserte på gamal informasjon.