Tre nye smittetilfelle i Kvam

Det melder Kvam herad tysdag morgon. Det er førebels uvisst om det er snakk om den muterte koronavirusvarianten.

Prøvane er sende til analyse på Haukeland, og ein reknar med å få svar innan nokre dagar.

Smittesporinga går føre seg. Alle nærkontaktar vert kontakta og må i karantene. Det same gjeld medlemer av husstandane til nærkontaktane.

Fleire tiltak kan koma i Kvam, men dette vert avgjort fyrst seinare i dag. Då vil ein ha fått fleire prøvesvar og kome lenger i smittesporinga, opplyser heradet.

I helga vart det kjent at ein lærar ved Kvam vidaregåande skule er smitta. Mellom andre klassen til vedkomande og deira nærkontaktar vart sette i karantene. Måndag kveld vart det kjent at læraren kan vera smitta av den muterte, britiske varianten av viruset, og difor vart også husstandsmedlemer sette i karantene. Ordførar Torgeir Næss (Ap) opplyser til HF at dei tre nye smitta er nærkontaktar.

Førebelse testar tilseier at det er den muterte varianten som kan ha spreidd seg i Ulvik og på Voss dei siste dagane. Ulvik herad innførte tysdag mellom anna forbod mot besøk i heimane. Berre matbutikkar får halda ope.