Toppe avviser borgarleg samarbeid for Senterpartiet

– Det er ikkje nokon tvil knytt til om vi skal støtta ei borgarleg regjering. Det skjer berre ikkje. Så dei som spekulerer i eit lineskifte i Senterpartiet, kan eg berre avvisa det, seier Toppe til Bergens Tidende.

Uttalen kjem etter at Senterpartiet for første gong sidan 1993 gjekk til val utan at landsmøtet hadde erklært kva regjering dei ville støtte. Partileiar Trygve Slagsvold Vedum påpeika på valkvelden at partiet har fått ein nøkkelposisjon i Stortinget.

Toppe understrekar likevel at Senterpartiet gjekk til val på å støtta Jonas Gahr Støre som statsminister:

– Det var vår side som vann valet, sjølv om vi som parti gjekk tilbake. Vi må visa respekt for det valresultatet og forvalta det fleirtalet på ein best mogleg måte.

Ho får støtte av andre nestleiar Bjørn Arild Gram, som overfor Adresseavisen seier at eit sideskifte er «absolutt heilt uaktuelt».

Toppe påpeikar at Senterpartiet har meir til felles med venstresida i viktige saker:

– Eg er trygg på at det er i samarbeidet med Ap og den sida vi får mest utteljing for våre saker. Men samtidig må Ap forvalta den tilliten rett, seier ho.

(©NPK)