Tombre satsar på økologisk oppdrett av laks

Oppdrettsverksemda Tombre vil satse på økologisk laks, som er i tråd med selskapet sitt langsiktige arbeid med å sikre god fiskevelferd og gode miljøforhold.

Tombre sette i sommar ut sin første økologiske fisk i eit anlegg i Skogseidvatnet i Bjørnafjorden kommune som er sagt å vere eitt av dei beste fiskevatna i landet. Yngelen kom då frå Femangerlaks som òg er godkjent for å produsere økologisk, skriv iLaks.no.

– Dette er ei ny satsing som firmaet ønskjer å innføre på delar av produksjonen. Målet er å levere økologisk fisk med Ø-merke frå ein sjølokalitet i Samnanger allereie til neste år, seier dagleg leiar Håkon Tombre i ei pressemelding.

I økologisk produksjon får fisken betre plass og det vert også stilt strenge krav til fôret. Det må komme frå økologisk landbruk eller vere avskjer frå berekraftig fiske og annan fisk som ikkje blir brukt til menneskeføde. Fisken må dessutan stå i nøter utan impregnering. Det fører til at nøtene må spylast oftare for å haldast reine. Reine nøter vil sikre fisken tilgang på nok oksygenrikt og friskt vatn.

Fisken skal bli om lag 100 gram før han blir sett ut i sjøen, kor mesteparten av veksten skjer fram til han blir slakta frå cirka 4,5 kilo og oppover.