To personar tekne av snøskred kom seg ut

– To personar vart tekne av skredet og sett fast i snøen. Dei vart ikkje skadde, men kom seg ikkje laus frå snømassane og ringde sjølv inn til nødetatane og bad om hjelp. Medan dei snakka med nødetatane og Hovudredningssentralen, kom dei seg laus frå snøen, skriv operasjonsleiar Ingrid Teigland Tepstad i Vest politidistrikt.

Politiet fekk melding om snøskredet, som har gått ved Vestre Rallarvegen i Ulvik kommune i Vestland, klokka 18.48.

– Dei involverte treng hjelp til å komma seg ut frå området. Politiet kallar ut frivillige til å hjelpa til med dette. Skredet har ikkje treft toglinja, skriv Tepstad.

I ei oppdatering skriv ho at Røde Kors er på veg frå Finse med fire snøskuterar.

Det er for tida stor snøskredfare i store delar av fjellet i Sør-Noreg.