Tinga 100 kassar kalkun

Homlagarden på Aksnes har byrja selja økologisk kalkunkjøt gjennom det som vert kalla rekoringen på Voss, med godt resultat, melder NRK Hordaland.

«Reko» står for rettferdig konsum, og ein reko-ring er ei kontaktplattform for folk og matprodusentar i deira nærområde. Marknadsansvarleg Els Geelen og kollegaene på Holmagarden bestemte seg for å prøva i haust. Ho hadde rekna med å få tingingar på tre–fire kassar med kalkunkjøt, men fekk seg ei stor overrasking.

– Det kom tingingar på over hundre kassar, fortel ho til NRK.

Ein reko-ring arrangerer treff mellom produsent og forbrukar. Kjøparane må tinga på førehand og hentar og betalar under treffet. Dermed vert ikkje produsenten sitjande att med overflødige varer, og kundane veit kva dei får.

Facebooksida «Reko-ringen på Voss» har over 4.300 medlemer. Over 420 av dei har kome til den siste månaden.

– Rekoringen på Voss har verkeleg teke av, seier Rebekka Bond, som tok initiativet til rekoringar i Noreg i 2017 etter inspirasjon frå Sverige.

Det vert selt grønsaker, kjøt, frukt, honning, kaffi, iskrem, egg og brød på treffa, som vert haldne ein gong i månaden, fortel ho til NRK.

– Rekoringane vart etablerte fordi mange som driv gardsbruk, har problem med distribusjon og ikkje får dekt utgiftene dei har med å produsera varene. Dei sit att med veldig lite, seier Bond.

– Trenden er at forbrukarane vil ha nærare kontakt med produsenten og vil vita kvar kjøtet kjem frå. Me trur det er grunnen til at rekoringane har vorte så populære, seier Geelen til NRK.