Stortingsvalet: Lokale resultat speglar nasjonale trendar

Berre 19 røyster skilde Frp og Ap så langt i stortingsvalet i Kvam, ei tid etter at dei førebelse resultata vart publiserte klokka 21. Frp hadde då sanka 1246 røyster og Ap 1227 røyster.

Frp ligg an til å få 25,1 prosent av røystene, mot Ap sine 24,7 prosent. Partia har med det ein framgang på høvesvis 9,9 og 4,4 prosentpoeng. Vel å merka vil resultatet truleg endra seg noko når dei siste par hundre røystene vert talde tysdag.

– Gratulerer! sa ordførar Torgeir Næss (Ap) og rekte varaordførar Frode Nygård (Frp) lanken meden dei to venta på at dei fyrste valtingsrøystene skulle verta leverte frå valkrinsane i Kvam rådhus.

Etter Frp og Ap fylgjer Sp med 12,3 og H med 11,3 prosent oppslutning i Kvam. Sp ligg an til å få ein tilbakegang på heile 10,2 prosentpoeng lokalt.

– Overraska

Nygård er nøgd mellom anna med å konstatera at Frp truleg vert størst i tre av fem valkrinsar i Kvam: Norheimsund, Tørvikbygd og Strandebarm. Partiet er elles større enn Sp i Øystese, som tradisjonelt har vore ein Sp-bastion. I stortingsvalet i 2021 hamna Frp heile 13,4 prosentpoeng bak partiet.

– Eg er overraska over at me har «vunne» i tre krinsar, og var større enn Sp i Øystese, seier Nygård.

Han seier at partiet har gjennomført valkampen heilt som normalt, med standar og postkasseaksjonar, med «ingen unormale stunt».

– Eg trur ordføraren såg føre seg at det skulle verta så tett mellom Frp og Ap. Eg har ikkje hatt ei spesiell kjensle. Eg er like overraska no som i kommunevalet over at me har gjort det så godt.

Frp ligg an til å få 48 stortingsmandat, ein auke på 27.

– Frp har gjort det godt i heile landet. Kvifor det, trur du?

– Mange vil ha eit skifte. Mange kjenner på at dei har mindre pengar, og eg treffer ein del av dei også i Kvam. Dei kjenner på at dei bestemmer mindre over eigne midlar enn før. Staten har teke mykje frå kommunane, også Kvam, i form av nye ekstraskattar dei siste åra. Til dømes høgprisbidraget på kraft og auken i grunnrenteskatt. Det siste fører til lågare verdi på kraftverka, slik at me kan tapa eigedomsskatt i tillegg seinare. Kvam kan få ein alvorleg smekk der, seier han.

– Godt resultat

Ordførar Næss, som også er leiar i Vestland Ap, slår fast at Ap har gjort eit godt val. Hordaland får truleg fire mandat på vestlandsbenken, Sogn og Fjordane 1 og partiet 53 totalt på Stortinget.

– Samanlikna med domedagsstemninga som rådde før jul, er dette eit godt resultat. Eg er nøgd i Kvam òg, sidan me går ganske kraftig fram, seier han.

Næss seier at han hadde rekna med at Frp ville verta størst i Kvam, med tanke på førre valresultat og den gjennomsnittlege framgangen til Frp sidan.

– Frp har gått mindre fram i Kvam enn partiet har gjort i snitt nasjonalt, seier han.

Almeland inne

Nasjonalt er Ap vel 4 prosentpoeng større enn Frp, og det ligg an til å verta eit relativt klart raud-grønt fleirtal på Stortinget. 

Både H og Sp går kraftig tilbake samanlikna med 2021-valet. V hamna under sperregrensa, som inneber at partiet ikkje får utjamningsmandat, og nestleiar Sveinung Rotevatn får ikkje plass. Det gjer kanskje Grunde Kreken Almeland (V) frå Øystese, som stilte til val for Oslo valdistrikt.

MDG kom over sperregrensa for fyrste gong i historie og ser ut til å få 8 stortingsmandat, mellom dei tidenes yngste stortingsrepresentant, Fröya Skjold Sjursæther. Raudt ligg an til å få 9 mandat, men harding Terje Kollbotn frå Ullensvang er ikkje mellom dei. KrF kom seg over sperregrensa og ser ut til å få 7 mandat.

I Ullensvang er Ap så langt størst med 33,5 prosent og Frp nest størst med 20,8 prosent av røystene. Sp fekk 15,9 prosent, men er framleis størst i Jondal valkrins. Både Ap og Frp hadde stor framgang sidan sist, på høvesvis 7,8 prosentpoeng og 9,0 prosentpoeng.