Støre lovar brei straumløysing: – Det vil handle om milliardar

Ei breiare løysing for å hjelpe folk med straumrekninga kjem om «veldig kort tid», varslar statsminister Jonas Gahr Støre (Ap). Ho vil koste milliardar.

– Vi skal ha ei brei løysing som sørgjer for at staten, som har ekstraordinære inntekter i denne straumkrisa, gir tilbake pengar til hushalda, som har ekstraordinære utfordringar, sa Støre til Stortinget onsdag.

– Det vil handle om milliardar. Og det skal treffe, la han til.

Regjeringa har alt varsla auka bustøtte, sosialhjelp og studiestøtte. I tillegg blir det altså jobba med ei ny ordning for å gi straumstøtte til vanlege hushald. Denne er klar inan nokre «timar, eller ein dag eller to», ifølgje Støre.

Blir knytt til straumrekninga

På spørsmål frå Tina Bru (H) om korleis støtta skal bli gitt varslar Støre at dette vil vere knytt til straumrekningane til folk.

– Dette er ein god kanal, seier han, og varslar at pengane skal kunne komme rett over nyttår.

Regjeringa skal òg ha ein dialog med straumselskapa for å sjå på moglegheitene for utsetjing av betaling, opplyste han.

– For seint

Både Høgre og Framstegspartiet kritiserte regjeringa for å vere seint ute med tiltak for andre enn dei med mest sårbar økonomi.

– Det manglar framleis løysingar for alle som no slit med straumrekninga, barnefamiliar, pensjonistar og einslege med vanleg inntekt som ikkje toler denne sjokkrekninga, sa Bru.

Også SV-leiar Audun Lysbakken er utolmodig.

– Den klare forventninga vår er at dagens forslag berre er eit første steg, også hushald med vanlege arbeidsinntekter slit med straumrekningane, seier han.

«Drittpakke»

I spørjetimen fekk statsministeren òg fleire spørsmål om den nye nettleigeordninga som trer i kraft ved nyttår, der det mellom anna blir innført ei ny «rushtidsavgift» på straum.

Ein «drittpakke», meinte Raudts stortingsrepresentant Sofie Marhaug, medan SVs Lars Haltbrekken ville vite om regjeringa vil vurdere å utsetje den nye ordninga.

Det svarte Støre avvisande på.

– Vi har ikkje planar om å utsetje den ordninga, sa Støre.

Han forklarte at den nye nettleiga vil oppmuntre folk til å bruke straum på dei tidene av døgnet der det er billigare, noko som kan bidra til meir effektiv bruk av kraftressursane.

(©NPK)