Steine har søkt på ny jobb

Rådmannen i Kvam har søkt om jobb i Bergen.

Arild McClellan Steine har søkt om stillinga som kommunaldirektør for barnehage, skule og idrett, ei stilling Anne-Marit Presterud har hatt. Åremålet hennar på seks år går ut i år.

Ikkje aktiv

Trass søknaden nynnar ikkje rådmannen konstant på Knudsen- og Ludvigsen-songen med breiflabben og regnet: ”Eg ve te Bergen, ve te Bergen med det samme.”

– Eg er ikkje aktiv jobbsøkjar, men vart oppmoda til å søkja. Eg synest jobben er interessant fordi det er ein stor kommune med store utviklingsmogelegheiter. Eg søkjer meg på ingen måte vekk frå Kvam, fortel Steine.

Han var på jobbintervju måndag, men veit ikkje når avgjerda vert teken. Han er ein av 14 søkjarar til stillinga.

Langsiktige tankar

Steine forsikrar at han har eit langsiktig perspektiv på jobben i Kvam.

– Om eg ikkje får jobben i Bergen, vil motivasjonen for jobben her vera den same som før, seier rådmannen.

Han opplyser at han orienterte ordførar Jostein Ljones (Sp) om det då han søkte på jobben.

Steine har vore rådmann i Kvam sidan 2011.

Søkjarane

To av dei som har søkt på kommunaldirektørstillinga, er anonyme.

Dei andre, utanom Steine, er Thorbjørn Gaarder, Krister Hoaas, Jørn-Arild Mikkelsen, Atle Lothe, Ståle Nordøen, Roald Valle, Anne-Merete Mærli Hellebø, Per Roger Ekse, Jostein Nesse, Hjalmar Olseth og Christian Lampe.