Solberg vert styreleiar i Kvammabadet KF
Reidun Skålheim Solberg overtek som styreleiar i Kvammabadet KF.
Leiar i valnemnda, Frode Nygård (Frp), vart nyleg gjord merksam på at det kommunale føretaket ikkje kan ha same person som både styreleiar og dagleg leiar. Det siste året har Frank Helland hatt båe rollene.
Torsdag 8. desember valde heradsstyret Reidun Skålheim Solberg, som har vore styrelem sidan starten, til ny styreleiar for dei to neste åra. Helland går over i rolla som nestleiar i eitt år.
Artikkelen held fram under annonsen.
Solberg er tilsett i Sparebanken Vest, som har gjeve lån til Hardangerbadet Eigedom AS i samband med bygginga av anlegget. Nygård opplyser at habiliteten hennar vart drøfta då ho fekk plass i styret for selskapet, og at konklusjonen var at det ikkje var nokon konflikt mellom tilsetjinga og vervet.
Styreleiaren får ei godtgjersle på 80.000 kroner – ein auke på 10.000 kroner –, nestleiaren 40.000 kroner og styrelemene 25.000 kroner. I tillegg får dei ei godtgjersle på 3.000 kroner per møte dei deltek i. Godtgjerslene skal aukast i samsvar med pris- og lønsvekst frå og med 31. desember 2023.
Den andre faste medlemen i styret er John Audun Jensen. Varalem er Marie Steine.
Tidlegare er styregodtgjerslene reduserte monaleg og talet på faste styrelemer reduserte frå fem til tre.
