Smitteverntiltak også i jula – men du kan ha inntil ti gjester på julaftan

Regjeringa held oppe tilrådinga om at ein kan ha inntil fem gjester til over nyttår, men opnar for unntak på to av dagane til inntil ti gjester.

– Jula er jo ei tid for nærleik, ikkje avstand. Vi vil at alle skal få feire jul med så mange som mogleg av dei ein ønskjer rundt seg. Det fortener vi, ikkje minst i år, sa statsminister Erna Solberg (H) på pressekonferansen til regjeringa om koronasituasjonen onsdag.

Ho seier dei er bekymra for at julefeiringa skal føre til meir smitte i samfunnet. Derfor er det nødvendig med smitteverntiltak også i jula. Men det blir lempa på nokre tiltak for at folk skal kunne feire jul og nyttår litt meir som normalt.

Hovudregelen er at ein avgrensar det talet menneske ein har sosial kontakt med gjennom heile perioden, og ikkje minst i førjulstida.

Regjeringa held derfor oppe tilrådinga om at ein kan ha inntil fem gjester til over nyttår, men opnar for inntil ti gjester på to av dagane.

Solberg seier det alltid må vere minst ein meters avstand mellom alle som elles ikkje bur saman. Tilrådingane gjeld for heile landet.