Sløkte brann i Ålvik snøgt

Ein brann hjå Elkem Bjølvefossen førte til evakuering av dei tilsette i natt.

Brannen i smelteverksområdet førte til mykje røyk, og brann- og redningstenesta rykte ut frå tre stasjonar. Også politiet og ambulansetenesta rykte ut.

Berre eit kvarter etter at 110 Vest via X fyrst varsla ålmenta om brannen klokka 04.46, vart det meldt at han var sløkt. Tilsette som fekk i seg ein del røyk, fekk helsetilsyn, men dimitterte på staden.

Ifylgje Vest politidistrikt kom meldinga om hendinga klokka 04.16. Klokka 05.53 sa naudetatane seg ferdige med innsatsen.

Administrerande direktør ved Elkem Bjølvefossen, Hroar Holm Carlsen, fortel at sprut av flytande metall gjorde at det tok fyr i noko utstyr i ein hall. Det førte til ein del røyk.

– Dette var ingen stor brann, og brannvesenet fekk raskt kontroll, seier han.

Han er ikkje samd i påstanden om at tilsette fekk i seg røyk.

– Dette stemmer ikkje med dei opplysningane eg har fått. Folk var i kontrollromma og ikkje i hallen då det byrja brenna. Det stemmer at dei rutinemessig fekk tilsyn av helsepersonell, seier han.

Også torsdag morgon brann det på verket. Då fekk strålevarme frå ei varm ause det til å brenna i ein robotarm.

– Dei to hendingane har ingenting med kvarandre å gjera. Det er rein uflaks at me fekk to brannar på kort tid. Alle slike hendingar vert granska internt for å sjå om me må endra rutinane, seier Carlsen.