Slit med å få tak i barnehagelærarar

Andelen kommunar som melder om problem med å få tak i barnehagelærarar, har auka frå 43 prosent i 2023 til 55 prosent i 2025, viser KS’ arbeidslivsmonitor for 2025.

Mest utfordrande er det framleis å få tak i sjukepleiarar. Av dei 157 kommunane som har svart på spørsmålet, synest 81 prosent det er svært eller ganske utfordrande å rekruttere sjukepleiarar. Det er likevel faktisk eit fall – frå heile 93 prosent i 2023. Andelen som slit med å få tak i legar, har også falle kraftig.

Langsam auke i heiltid

Gjennomsnittsalderen i kommunesektoren kryp faktisk sakte nedover – i 2020-undersøkinga låg han på 44,6, i 2024 ligg han på 44,4 år. Totalt jobbar 502.600 personar i kommunesektoren inkludert fylkeskommunar, og litt under halvparten av desse jobbar i helse- og omsorg. Dei største stillingskodane ved utgangen av 2024 var «assistent», «fagarbeidar» og «helsefagarbeidar/hjelpepleiar». Tre av fire tilsette er kvinner.

Andelen heiltidstilsette i kommunane kryp på si side langsamt oppover. I alt er no 61,8 prosent av dei tilsette i kommunane, mot knappe 50 prosent for ti år sidan. Auken har vore klart størst blant kvinnelege tilsette – der knappe 44,2 prosent hadde heiltidsjobb i 2014, og 58,9 prosent no. Ser ein på kommunesektoren samla sett er den gjennomsnittlege stillingsbrøken no 84,3 prosent.

Framleis dårlege tider i helse

Det er likevel framleis nokre sektorar som slit meir enn andre. Helse og omsorg ligg samla sett på 36 prosent heiltidsstillingar, sjølv om turnustilsette er over snittet på 69 prosent. I kommunale barnehagar er det berre 48 prosent heiltidstilsette.

Heiltidsprosenten varierer også rundt om i landet – i Innlandet er det berre 30,4 prosent av dei turnustilsette i helse og omsorg som har heiltidsstilling, mot heile 51,2 prosent i Finnmark.

Kommunane har fått spørsmål om digitalisering. Heile 75 prosent har svart at dei har ein digitaliseringsstrategi, utan at dette inneber ei endring frå tidlegare undersøkingar.

Få frigjer arbeidskraft

Dei siste to åra har likevel gevinsten av digitaliseringa vore blanda.

• Heile 64 prosent har oppnådd forenkling av arbeidsprosessar i svært eller ganske stor grad.

• Berre 46 prosent har oppnådd auka produktivitet i tenesteproduksjonen.

• Berre 32 prosent svarer at dei i ganske stor grad har frigjort arbeidskraft til andre/nye oppgåver. Ingen av kommunane har svart at dei oppnår dette i svært stor grad.

• 61 prosent har svart at dei sette i gang tiltak for å auke KI-kompetansen blant dei tilsette.

Alle dei 371 kommunane i landet og fylkeskommunar unnateke Oslo har fått spørsmål i undersøkinga, som vart gjennomført frå 3. april til og med 4. juni. 157 av dei 356 kommunane og 11 av 14 fylkeskommunar har sendt inn svar på nokre eller alle spørsmål.

(©NPK)