Slik køyrer du i styrtregn
Ekstremvêret Hans kan føre til vanskelege køyreforhold. Naf åtvarar mot vassplaning og store dammar som kan skade bilen om du køyrer ut i dei.
– Avpass farten etter forholda, og la bilen stå dersom det kjem ekstreme nedbørsmengder. Skal du ut å køyre, så set farten ned, spesielt på stader der det er mykje vatn i vegbana. Med dei nedbørsmengdene som no er varsla, er faren for vassplaning stor, seier Jan Harry Svendsen, rådgivar i Naf, i ei pressemelding.
Det kan også bli dårleg sikt i tett regn, og då er det viktig å sjekke både baklys og køyrelys.
Artikkelen held fram under annonsen.
– Mange bilførarar er ikkje klar over at dei køyrer rundt med feil innstilte lys. Du må sikre at du både ser og blir sett, seier Svendsen.
Dersom du køyrer inn i store dammar som har samla seg i vegbana, kan vatn trenge inn i styringseiningar og motorar.
– Vi oppfordrar til å vere svært forsiktig med å køyre ned i vassdammar utan at du veit kor djupt det er. Dei fleste bilar er ikkje bygde for å vade gjennom djupt vatn. Resultatet kan bli svært kostbart dersom ein tek sjansen og det viser seg at vatnet er djupare enn ein først trudde, åtvarar Svendsen.
Naf åtvarar også elbileigarar om at rekkjevidda kan minke på vått føre. Pass difor på kor mykje straum du har på batteriet og lad før det går under 10 prosent.
(©NPK)
