Sivilforsvaret testar varslingsanlegga onsdag
Onsdag testar Sivilforsvaret signalet «Viktig melding – søk informasjon» i alle kommunar der det er montert varslingsanlegg.
Sivilforsvaret testar alle varslingsanlegga i landet to gonger i året, klokka 12 den andre onsdagen i januar og juni.
Signalet blir sendt i tre seriar med eitt minutts opphald mellom seriane. Signalet betyr at du skal søkje informasjon i til dømes radio, TV, avisar, på nettsidene til styresmaktene og i sosiale medium.
Artikkelen held fram under annonsen.
Rundt om i landet er det cirka 1.250 anlegg som skal varsle befolkninga ved akutt fare. Varslingsanlegga kan bli brukte både i fred og krig.
– I fredstid kan varslingsanlegga mellom anna brukast ved industriulykker med utslepp av giftige eller farlege stoff. Medan i krig kan anlegga brukast ved fare for angrep, seier Øistein Knudsen jr., som er sjef for Sivilforsvaret.
Sivilforsvaret testar varslingsanlegga for å sjekke om dei verkar, og reparerer dei som ikkje fungerer.
(©NPK)
