Satsar stort på skule og idrett i Jondal

Det vart ingen dramatikk då kommunestyret i Jondal onsdag vedtok budsjettet for 2018 og økonomiplanen for fire år. Vedtaket inneber ei storstila satsing på skule og idrett.

– Det er stor semje om det som er lagt fram, sa ordførar Jon Larsgard (Sp).

Dermed vedtok dei folkevalde mellom anna ei skule- og idrettshallsatsing til vel 100 millionar kroner. Det har kommunen råd til som følgje av stram økonomistyring over tid som har gjeve eigenkapital og dermed handlingsrom, sa ordføraren.

Han slo fast at det enno står att å ta stilling til storleiken – på hallen, altså. Han understreka at intensjonsavtalen med Odda og Ullensvang slår fast at alle forpliktar seg til å arbeida for å realisera hallen.

Budsjettvedtaket inneber at kommunen svir av 300.000 kroner frå disposisjonsfondet for å kjøpa ein akutthjelpbil til brannstellet i 2018. Magnar Sollesnes (Sp) nytta høvet til å kritisera Helse Fonna for å ta frå jondølingane den lokalt stasjonerte ambulansen, noko som medfører ei utrykkingstid på 30–50 minutt i Jondal. Det meiner Sollesnes er uforsvarleg. I ettertid har kravet om såkalla first responder-funksjon kome til kommunane.

– Me må betala for det dei har teke frå oss. Dei får ta rekninga, sa Sollesnes.

Ordføraren samtykte, men påpeika at det ikkje er noko nytt at kommunane vert pålagde nye oppgåver, men ikkje nye pengar.

Kommunestyret bad om ei utgreiing av kapasiteten og trongen for sjukeheimsplassar, og omdisponerte 250.000 kroner i sentraladministrasjonen til miljøarbeidar i flyktningtenesta. 150.000 vart løyvde til opprusting av badeplassen i Vik. 24.000 ekstra går til teknisk eining for å sikra betre stell av grøntområde.