Samrøystes i snuoperasjon som «berga» Blåhuset

Ikkje uventa stadfesta kommunestyret i Ullensvang onsdag føremiddag tilrådinga frå formannskapet samrøystes: Blåhuset vert ikkje selt no.

Avgjerda kom i stand utan andre sverdslag enn det som handla om kven som har vore for og mot å kvitta seg med huset. Dei harde fakta er at berre R røysta mot då salet vart vedteke i 2025-budsjettet.

– Det er inga skam å snu, konstaterte Terje Kollbotn (R).

Eit av argumenta for å droppa salet er uvisse om den stipulert innsparinga på 250 000 kroner. Randi E. Oppedal (Sp) vart den einaste som spurde rådmannen om reknestykket som ligg til grunn for estimatet.

Då kom det fram at rådmann Ole-Jørgen Jondahl meiner at innsparinga er høgare, nærare bestemt 284 486 kroner. Vel å merka rommar dette reknestykket eit overslag over kor mykje kommunen brukar innan byggdrift og reinhald på huset i Jondal. Elles utgjer straumen ingenting. Leigeinntekter vart ikkje omtala.

Fleire understreka at kommunen, næringslivet og ibuarane no må samarbeida for å skapa liv i huset.