Samla inn éin million til «steinknusarane»
Kronerullinga til Framnes-russen har gitt resultat.
1.007.487 kroner - det er den endelege summen russen på Framnes kristne vidaregåande skule har samla inn i årets misjonsprosjekt. Pengane går til hjelpearbeidet for moderne slavearbeidarar i ulovlege steinknuseverk i India.
Det melder skulen om i ei pressemelding.
Russen har samla pengar gjennom diverse aktivitetar, mellom anna det årlege misjonsløpet på skulen, som i år hanka inn 675.000 kroner til kassen. Også andre elevar, foreldre og tilsette har bidrege.
- Russen brukar med andre ord mykje tid og krefter på at fattige menneske i andre land skal få hjelp. Avgangselevane på skulen har dei siste ti åra samla inn godt over 10 millionar kroner, står det i pressemeldinga.
Det finst over 1.000 ulovlege knuseverk og 50 ulovlege gruver i delstaten Jharkahand; mange av dei i område som tilhøyrer urfolka. Fattige - både vaksne og born så unge som fem år - vert tvinga til å jobba i knuseverka fordi dei treng inntektene.
Det er organisjonen Normisjon som driv hjelpearbeidet. Innsatsen så langt har gitt resultat: Nesten halvparten av arbeidarane i målgruppa brukar verneutstyr, vassprinkling reduserer støv og påfølgande helseskadar, dei fleste lokalsamfunna har tilgang på reint drikkevatn og innbyggarane får opplæring i andre alternative yrke.
