Samde om å jobba for vegprosjekt

Ordførarane i Kvam, Jondal, Odda og Kvinnherad møttest måndag for å sjå om dei kunne verta samde om å arbeida for å rusta opp vegane i distriktet.

Då Jondalstunnelen AS i haust lanserte at selskapet vil arbeida for ein ny tunnel mellom Nordrepollen og Austrepollen, var Kvinnherad-leiinga kritisk. Årsaka var frykt for at prosjektet vil ta trafikk frå ferjesambandet Årsnes–Gjermundshavn.

Måndag hadde ordførar i Kvinnherad, Peder Sjo Slettebø (H), invitert til møte for å freista få til eit samarbeid, skriv Grenda.

Ifølgje Slettebø er ordførarane samde om å arbeida i fellesskap for å få realisert flest mogleg vegprosjekt, mellom anna å få utbetra vegen mellom Årsnes og Mauranger og ein ny tunnel mellom Nordrepollen og Austrepollen.

Først skal alle ordførarane ta saka opp med formannskapa for å sjå om det er grunnlag for å ta saka vidare til fylket, seier Slettebø til Grenda.

Ordførarane var også samde om at det vidare arbeidet med tunnelen skal frontast av kommunane, ikkje tunnelselskapet, skriv Grenda.