Ringjer i klokkene for sivile i Gaza

Biskopane i Den norske kyrkja oppmoda fredag kyrkjer over heile landet til å ta i bruk kyrkjeklokkene saman med domkyrkjene i landet. Torsdag 7. august vert ei solidaritetsmarkering for sivilbefolkninga som lid i Gaza.

– Dag for dag høyrer vi nyheitsmeldingar om ein situasjon som blir forverra, i det som allereie har vorte ein humanitær katastrofe. Med over 60.000 døde i Gaza kjenner vi alle på eit kall og eit behov for å gjere noko, seier preses i Den norske kyrkja Olav Fykse Tveit i ei pressemelding.

Kyrkjeverje Olav Skeie Lid i Kvam opplyser at kyrkjeklokkene i alle kyrkjene i Kvam skal ringje. Det har han og leiar Kjell Dysvik i det kyrkjelege fellesrådet saman kome fram til.

I Ullensvang visste ikkje kyrkjeverje Oddbjørn Vestbøstad måndag korleis oppmodinga frå bispemøtet vil verte fylgd opp, all den tid han nettopp var tilbake frå ferie.

Ber for israelske sivile og gissel

Dei jødiske trussamfunna i Oslo og Trondheim skriv i ein e-post til NTB at initiativet er positivt, men at dei likevel er skuffa.

– Når kyrkjeklokkene ringjer, håpet vi at dei skulle ringje for alle – både for dei sivile palestinarane som lid i Gaza, sivile israelarar som blir skadde av rakettane frå Hamas, og for gissela som framleis ikkje har komme heim, uttaler Det mosaiske trussamfunnet i Oslo (DMT) og Det Jødiske Samfunnet i Trondheim (DJST).

Behov for å bryte stilla

Bispemøtet markerte si støtte i mai da det kravde at «alle legitime politiske og økonomiske virkemidler» må vurderast for å presse Israel til å stanse «det som framstår som etnisk rensing i Gaza».

– Sidan da har situasjonen forverra seg, og vi ser behov for enda ein gong å bryte stilla, seier Fykse Tveit.

Han omtaler markeringa torsdag som eit rop om merksemd for dei som lid, men også eit kall til bønn og handling frå så mange som mogleg.

– Det at Den norske kyrkja ved denne markeringa, lèt vere å nemne dei sivile jødane som også er offer, maner ikkje til auka dialog her heime mellom trussamfunna. Det er vi skuffa over, uttaler DMT og DJST

Lys i mørke

Kyrkjerådet-leiar Harald Hegstad støttar markeringa og oppmodar alle kyrkjer som har moglegheit, til å invitere til lystenning og forbønn, ein konkret og symboltung handling, der ein kan tenne lys i ein mørk situasjon.

Kyrkjerådsleiaren presiserer at oppmodinga ikkje er bindande. Deltaking kan variere frå stad til stad ut frå lokale situasjonar og bemanningssituasjon i ferien.

(©NPK)