Rapport: Gratis barnehage gir liten samfunnsøkonomisk gevinst
Gratis barnehage gir ikkje den store samfunnsøkonomiske gevinsten som ein kan ha trudd. Totalt vil det koste oss 2,4 milliardar kroner årleg, viser ein ny rapport.
Det har i rapporten vorte sett på kva gratis barnehage vil bety for barn, familiar, barnehagesektoren og samfunnet elles.
Rapporten er utarbeidd av ei arbeidsgruppe frå Ap, SV og Sp.
Annonse
– Denne rapporten gir oss nyttig kunnskap om korleis ein kan innføre heilt gratis barnehage dersom det skulle bli økonomisk rom for det, seier kunnskapsminister Kari Nessa Nordtun (Ap).
Løyvingsbehovet blir anslått å koste 2,4 milliardar kroner. Arbeidsgruppa understrekar likevel at deltaking i gode barnehagar kan ha positive konsekvensar på kort og lang sikt som ikkje nødvendigvis lèt seg måle. Men analysen viser eit netto samfunnsøkonomisk underskot som blir anslått veldig usikkert, til 154 millionar kroner.
SSB har jobba med tala og gjort analysen bak rapporten med den lange tittelen «Lite i det store, stort i det små. Gratis barnehage for alle barn – gratisprinsippet i møte med kvalitet og sosial utjevning».
Den konkluderer med at omtrent 200 ekstra barn (0,45 prosent) vil byrje i barnehage som følgje av at han blir gratis. Det er ein beskjeden auke når dekninga i dag er på 94,5 prosent (omtrent 264 000 barn). Det er sidan 2023 gjennomført gratis barnehage i kommunar i Finnmark og Nord-Troms. Det viste seg å vere positivt for familieøkonomien mellom anna. Men foreldreåtferda vart i stor grad uendra, og deltakinga auka ikkje.
Annonse
Rapporten seier også at neste skifte i barnehagehistoria må handle om ein berekraftig sektor der kvaliteten er høg, barna har det godt og dei tilsette trivst og ønskjer å bli verande.
(©NPK)
