Polititilsett i Vest politidistrikt suspendert – sikta for truslar

Politimeisteren i Vest politidistrikt har suspendert ein tilsett etter at vedkommande natt til tysdag vart arrestert og sikta for truslar.

Suspensjonen er gjort med heimel i statstilsettelova og gjeld med omgåande verknad, skriv politidistriktet i ei pressemelding. Tilsetjingsrådet skal behandle suspensjonen på sitt første ordinære møte i august.

– Statsadvokaten er beden om å utnemne settepolitidistrikt, og Rogaland politidistrikt skal overta etterforsking av straffesaka, heiter det i pressemeldinga.

Politiet i Vest legg til at dei ikkje vil gi fleire opplysningar om verken straffesaka eller suspensjonen utover innhaldet i pressemeldinga.