Politikarar får frislepp rett i fleisen
Utnyttingsgraden og høgdegrensene i reguleringsplanen for Tokagjel fjellstove (biletet) må vera i samsvar med kommunedelplanen for Kvamskogen. Det krev fylkeskommunen i ei fråsegn i høyringa.
Då planutvalet i Kvam handsama planutkastet i haust, vedtok dei samrøystes å stryka ei rekkje krav rådmannen fremja. Mellom anna ville dei godta at området vert utnytta som eit senterområde, sjølv om det nye planframlegget legg til rette for seks hytter som erstatning for fjellstova.
Når føremålet vert endra frå senterområde til fritidsbustader, må framlegget vera i tråd med retningslinene i den overordna planen for utnyttingsgrad og byggjehøgd på hyttetomter, skriv fylkesrådmannen.
Han rår dessutan frå å godta garasjar på tomtene og parkering utanfor fellesplassen. Også dette er i tråd med synet til rådmannen, men dei folkevalde fjerna restriksjonane før høyringa.
