Peer skrønte seg til applaus

Nervøsiteten forsvann straks Helle Berg Leiren – alias Peer Gynt – kom seg ut på scena.

– Det har vore veldig mykje øving, men veldig kjekt òg, med mange fine folk, seier Helle nokre minutt etter at vårens store dramatiske mål er nådd.

Fredag kveld stod eller sat nemleg kring to hundre personar på scena, då elevar og lærarar ved Kvam kulturskule, seks lokale kor og om lag 75 musikarar i Bergen Filharmoniske Orkester framførte Ibsen-klassikaren «Peer Gynt».

Det gjorde dei for ein fullsett idrettshall. Nær 600 var på plass for å få med seg ferda til den feige og løgnaktige hovudpersonen og ymse kjende figurar som Ingrid, Solveig, Dovregubben og Knappestøyparen.

Sjå fleire bilete i denne saka:

– Han lyg mykje

Helle var ein av ei heil rekkje teaterelevar som spela Peer Gynt, men saman med to andre spela ho ein del meir enn resten av «peerane». Ho fortel at ho er sliten etter lange og mange øvingar den siste tida, men at det trass alt har gått greitt å kombinera det med skulen.

– Korleis var det å stå på scena?

– Det var veldig kjekt. Og ikkje så skummelt då eg fyrst stod der.

– Kva visste du om Peer Gynt frå før?

– Ikkje noko. Eg har lært mykje. Han lyg ein god del, seier Helle, som har planar om å halda fram som elev på dei skrå breidder.

Medan Helle var med på ei stor framsyning for fyrste gong, har Perle Nygård og ein del andre allereie stått på scena i to store framsyningar før: «Askepott» i 2022 og «Ei juleforteljing» i 2023.

– Men du har ikkje vore med når så mange og eit heilt orkester har vore med?

– Nei, det var litt uvant, men betre musikk og veldig høg lyd.

– Var du nervøs?

– Ikkje så veldig, seier Perle.

– Litt skummelt

Ei rekkje dansarar i kulturskulen deltok, men berre Elisabeth Vik dansa mutters åleine på scena saman med den eine peeren. Ho framførte «Anitras dans». Ho har øvd mykje, både på kulturskulen og heime.

– Korleis har det vore å vera med?

– Veldig kjekt og veldig travelt, seier Elisabeth, som har dansa i om lag to år.

– Korleis var det å dansa åleine med så mange som såg på og så mange musikarar framføre deg?

– Eg har dansa åleine før, men det er litt skummelt når det er så mykje folk. Men eg tenkte ikkje over det, seier ho.

– Spreidde glede

– Dette var utruleg intenst og utruleg kjekt. Eg er rørt over alle borna som er så flinke, dei lokale kora og ikkje minst Amalie, som har sydd alt saman, seier BFO-dirigent Ingunn Korsgård Hagen.

Ho møtte dei lokale heltane torsdag, medan BFO-musikarane elles fyrst fekk treffa dei fredag. Trass kort samkøyringstid synest ho at stykket «sat».

– Så lenge ein gjev alt, prøver å formidla musikk, legg sjela i det og vil noko med det, kan ingenting gå gale. Det handlar ikkje om rett og feil, men om å spreia musikkglede. Det synest eg at alle gjorde, seier Hagen.

Ho trur at mange fekk innblikk i både «Peer Gynt» og BFO, og vonar at folk ser at det ikkje er det minste skummelt å gå på klassiske konsertar. Dei unge på scena lokka truleg ein heil del som elles ikkje ville ha kome for å høyra på BFO. Grunnskuleelevane kom endåtil gratis inn.

– Det verkar som om folk syntest det var fint, sjølv om dei kanskje ikkje har vore på opningskonsert før, seier Hagen.

– Eg er superstolt!

Stykket er bygt på ei omsetjing av «Peer Gynt» til nynorsk, skriven av strandberming Jon Fosse. Regissør, forfattar og forteljar Amalie Jensen Tolo har saman med Ingeborg Ekeland tilpassa teksten til det aktuelle formatet.

Tolo tok til tårene opptil fleire gonger etter at utøvarane hadde teke imot ståande applaus. Etterpå takka ho elevane for innsatsen for førebels siste gong. Tolo sluttar nemleg i Kvam kulturskule for å frilansa attåt studium i musikk og helse.

– Eg er superstolt! For ein innsats av alle involverte! Ingunn har vore så imøtekomande og med på at dette skulle me gjera skikkeleg. Og elevane, hjelpe meg kva dei har vore med på! seier ho.

Det starta med ein tanke om nokre enkle tablå. Så voks det sakte, men sikkert. Etter innspel frå mellom andre BFO kom det til fleire scener og meir tekst for å få fram historia. Dimed måtte ho gå bort frå tanken om å prata minst mogeleg og lata musikken bera framsyninga.

– Elevane har stilt opp på ekstraøvingar og ikkje gjeve seg. Dei har terpa, terpa og terpa på detaljar, seier Tolo, som ser fram til å roa litt ned og ha betre tid.

– Viktig arena

Alle dei lokale kora og korpsa i Kvam var inviterte til å delta på høvesvis opningskonserten fredag og konserten med Sjøforsvarets Musikkorps sundag. Dei fleste deltok. Etter båe arrangementa hagla det med både lovord og tårer til utøvarar og arrangørar.

Festivalsekretær Arngunn Timenes Bell i Hardingtonar meiner at dei to hendingane er gode døme på samarbeid ho ser føre seg at Hardingtonar med fordel kan halda fram med.

– Ei god blanding av tilreisande og lokale krefter. Om Hardingtonar kan vera ein arena for å visa breidda og få fram kva som skjer lokalt, slik at ein kan både henta inspirasjon frå tilreisande og visa eigne krefter, trur eg det er viktig. Me skal ikkje undervurdera dei me har rundt oss kvar einaste veke, seier ho.

– Nokon sa til meg at dei hadde sett «Peer Gynt» på festspela i Bergen, men at dette kanskje var endå betre. Me har høyrt berre gode ord frå både rørte og begeistra, seier Bell.

HF gjer merksam på at dottera til skribenten var ei av fleire som spela Peer Gynt. Red.

Les også: