Øystesevassdraget vert urørt

I dag kom det svart på kvitt: Øystesevassdraget er samrøystes verna av Stortinget.

Denne gongen oppstod ingen uventa snuoperasjonar i tolvte time. Ikkje ein einaste stortingspolitikar sette seg mot vernet i ettermiddag.

- I dag feirar me at naturen og friluftslivet har vunne ein blank siger i denne veldig lange kampen, seier Den Norske Turistforening og Naturvernforbundet i ei sams pressemelding.

Dei takkar for det etterlengta vedtaket etter ein vel tretti år lang kamp. Avgjerda vart feira med ein fest på Miljøhuset i Oslo i dag. Der dukka mellom andre klima- og miljøminister Ola Elvestuen (V) opp og menga seg med fleire kvemmingar. Både Oddvar Soldal og Klaus Rasmussen i Naturvernforbundet i Kvam har lagt ned mange, mange timar i arbeidet for vernet.

Ein ingrediens i feiringa var vatn frå elva, som Terje Breivik (V) henta førre veke. Vatnet gjekk med til kaffien. På menyen stod dessutan ei marsipankake med motiv frå vassdraget som pynt.

- Det er ikkje kvar dag ein kan feira utelukkande positive naturvernsaker. Særleg ikkje i ei verd som ser ut til å gå feil veg. Det er fyrste gong på ti år at eit vassdrag får varig vern. Takk for innsatsen, sa Elvestuen, ifølgje pressemeldinga.

DNT og Naturvernforbundet takkar alle som har engasjert seg for vernet, og meiner det er utruleg gledeleg at alle parti er samla i saka.

Organisasjonane meiner elva er ei populær natur- og turperle som strekkjer seg urørt frå høgfjellet til fjorden. Dei meiner vernet viser kor viktig lokalt engasjement er.

- Hadde det ikkje vore for lokale krefter, mellom dei vårt lokallag i Kvam, hadde elva vore tørrlagd for lenge sidan, seier leiar Silje Ask Lundberg i Naturvernforbundet.