Opnar ny turistvegattraksjon i Hardanger
Ein ny rasteplass med utsiktspaviljong og toalett blir opna på Espenes mellom Odda og Kinsarvik i slutten av august.
På Espenes mellom Odda og Kinsarvik har Statens vegvesen bygd ein ny moderne rasteplass i attraksjonen Nasjonale turistvegar, skriv Statens vegvesen i ei pressemelding.
Anlegget sitt særpreg er ein 64 meter lang og 4 meter brei konstruksjon i rustfritt stål med 12 takmodular med varierande høgde. Takkonstruksjonen blir halden oppe av massive stålsøyler og er fundamentert på ei botnplate av betong. Dei samansveisa stålplatene er 6 millimeter tjukke og veg til saman 31 tonn.
Artikkelen held fram under annonsen.
Den høgste delen nærmast vegen inneheld toalett, mens rasteplassar under den lågare takkonstruksjonen tilbyr god utsikt nordover Sørfjorden.
Rasteplassen blir opna onsdag 31. august klokka 13.00. Turistvegattraksjonen kom på ein total kostnad på 40 mill. kroner, finansiert av den statlege løyvinga til attraksjonen Nasjonale turistvegar.
(©NPK)
