Omkøyringsvegen stengd – korkje Kvam herad eller entreprenør var informert
Fylkesveg 131 mellom Øystese og Fyksesund er stengd. Kvam herad fekk ikkje informasjon om at sjukehusvegen dermed er heilt stengd i periodar.
Årsaka er fare for isras på vegbanen ved Høyvika som følgje av mildare vêr og mykje is i fjellsidene. Vegvesenet skal vurdera rasfaren igjen klokka 12 i dag.
Trafikkoperatør Marianne Hove ved Vegtrafikksentralen vest opplyste i dag tidleg at vegvesenet arbeider med å avklara eventuell ekstra vegopning på Laupsa. Sidan kom det ei vegmelding om at det som følgje av stenginga vert ei ekstra opning av fylkesveg 7 på Laupsa klokka 10.45 til 11.15.
Hove seier fylkesveg 131 har vore stengd samanhengande sidan klokka 15.15 sundag. Det er tinga eit klatrelag som skal reinska fjellet for is, slik at vegen vonleg vert trygg att i dag.
Dermed er omkøyringsvegen som vert nytta når det vert utført vegarbeid på fylkesveg 7 ved Laupsa, heilt stengd. GBS entreprenør AS fekk nyleg aksept for å kutta opningstida midt på dagen, slik at vegen frå og med i dag skal vera stengd utan opphald mellom klokka 8.20 og 14.10. Som nemnt over vert det eit unntak frå dette i dag.
Rådmann Anita Hesthamar i Kvam herad var ikkje orientert om stenginga av fylkesveg 131 då HF kontakta henne i dag tidleg, men skal forhøyra seg med kollegaer. Heller ikkje dagleg leiar Bjørn Øyri i GBS entreprenør hadde fått informasjon om stenginga i dag tidleg.
Teknisk sjef Lars Ese Ur i Kvam herad seier det ikkje er nokon automatikk i at Kvam herad får informasjon om vegstengingar i kommunen. Etter at han vart merksam på stenginga i dag, har han varsla brannvernet og legevakta. Ålvik har både lege og brannmannskap, så beredskapen skal vera i orden, fortel Ur.
Me gjer merksam på at det i fyrste versjon av artikkelen vart opplyst feil tidsrom for opphavleg planlagd samanhengande stenging på Laupsa i dag. Det korrekte er frå 8.20 til 14.10, ikkje til 15.10.
