Oddabladet: Haug held fram trass ny kraftstilling

Roald Aga Haug (Ap) kjem til å søkja fritak som ordførar i Ullensvang etter at han vart vald til ny leiar i Landssamanslutninga av Vasskraftkommunar (LVK). Han gjev seg likevel ikkje i lokalpolitikken.

Det skriv Hardanger Folkeblad.

Tysdag vart Haug vald til ny leiar i LVK, eit heiltidsverv som gjer at han etter planen må fråtre ordførarvervet i Ullensvang.

– Han vil halda fram som medlem av kommunestyret og formannskapet ut valperioden, seier leiar i Ullensvang Ap, Tor Helge Tjemsland, til Hardanger Folkeblad.

Haug har vore ordførar i Ullensvang i 11 år. Som LVK-leiar får han kontorplass i Oslo, men han opplyser til avisa at han også kjem til å nytta seg av heimekontor.

– Det blir ein del reising, så det blir nok travelt, seier Haug.

Kven som tek over som ordførar, er førebels ikkje avgjort. Etter samarbeidsavtalane mellom partia som dannar fleirtalet i Ullensvang, er det Ap som skal peika ut ein ny ordførar.

Tjemsland seier til oddabladet at kandidaten skal veljast av styret og kommunestyregruppa på eit gruppemøte måndag 31. august. Deretter skal kandidaten presenterast på medlemsmøtet onsdag 2. september.

Også dei andre partia i Ullensvang-delegasjonen på LVK-landsmøtet uttrykte støtte til Haug, skriv Hardanger Folkeblad. Jørund Kvestad (Sp) seier samstundes at partia er spente på kven som vert ny ordførar.