Norske sjømatbedrifter blir utnytta av profesjonelle svindlarar til å lure fiskeimportørar i utlandet for store beløp. Politiet har fått inn over 40 meldingar og fleire personar i Noreg er arresterte. Illustrasjonsfoto: Gorm Kallestad / NTB scanpix / NPK

Norske sjømatbedrifter blir utnytta til å svindle utanlandske importørar

Ved å utgi seg for å vere norske sjømatbedrifter, lurer svindlarar fiskeimportørar i utlandet for store beløp. Fleire personar i Noreg er arresterte.

Ein av dei som vart svindla er Clement Insor-Brown i selskapet Ombro Ghana Limited. I januar bestilte han 26 tonn makrell frå ein som utgav seg for å jobbe for Espevær Laks på Bømlo i Sunnhordland.

– Eg fann selskapet på nettstaden Sea-ex.com medan eg leita etter norsk makrell. Eg kontakta dei, og dei svarte med eit tilbod, seier Insor-Brown til Aftenposten/E24.

Han fekk kort tid etter ein faktura på 31.360 euro, om lag 330.000 norske kroner, og ei stadfesting på at betalinga var motteken. Deretter vart det stille.

Dagleg leiar Arnstein Brekke i Espevær Laks seier selskapet berre driv med slakting og ikkje sal av produkt. Fleire eksportørar har vendt seg til selskapet etter å ha vorte utsette for svindel, og Brekke seier det er «veldig beklageleg» å bli utnytta på denne måten.

Politiet i Noreg etterforskar eit internasjonalt svindlarnettverk som har lurt til seg millionar av kroner. Det har komme inn over 40 meldingar og fleire personar frå ulike delar av landet er arresterte for kvitvasking.

– Eg kan ikkje seie så mykje om kven dei er, då det er ei etterforsking som går føre seg, seier avsnittsleiar Marthe Gaugstad Birkeland i økonomiavdelinga i Vest politidistrikt til avisa.

(©NPK)