Noregs ti verste fylkesvegar er kåra

– Det har vore svært vanskeleg å velje dei ti aller verste. Det finst altfor mange dårlege fylkesvegar, seier juryleiar Torill Eidsheim i Opplysningsrådet for veitrafikken (OFV), som står bak kåringa.

OFV er ein interesseorganisasjon med rundt 60 medlemer, blant dei trafikkorganisasjonar, bilimportørar, kollektivselskap, oljeselskap, forsikringsselskap og entreprenørselskap.

Fylkesvegane utgjer meir enn halvparten av vegnettet i Noreg, men har vorte vanskjøtta lenge, meiner Eidsheim.

Over 1500 nominasjonar er sende inn frå folk over heile landet. Juryen, som består av representantar for næringsliv og transportbransjen, har lagt vekt på tryggleik, framkome og kor viktige vegane er for kvardagsliv, beredskap og næringsliv.

– Dette er eit kraftig varsku om at noko må skje. Finalistane viser på kvar sin måte korleis manglande vedlikehald gjer vegane farlege, lite framkomelege og ubrukelege for både folk, tungtrafikk og nødetatar, seier Eidsheim.

Statens vegvesen reknar vedlikehaldsetterslepet til nær hundre milliardar kroner, men regjeringa har berre sett av ein halv milliard i øyremerkte midlar i inneverande statsbudsjett, påpeikar OFV.

Fylkeskommunane får også tildelt frie midlar, men desse skal dekkje heile ansvarsområdet.

– Vi ser auka vilje til satsing, men det seier seg sjølv at dette ikkje er i nærleiken av nok. Dess lenger vi ventar, dess dyrare og farlegare blir det, seier Eidsheim.

Dei ti finalistane er:

• Akershus – Fv. 33 Feiring

• Østfold – Fv. 1178 Gunnarstorp–Karlsøy

• Innlandet – Fv. 2434 Vest–Torprunden

• Innlandet – Fv. 2158 Valmen–Sjøenden

• Vestland – Fv. 49 Steinsdalen–Eikedalen

• Vestland – Fv. 615 Storebru–Sandane

• Trøndelag – Fv. 776 Hofles–Romstad

• Trøndelag/Nordland–Fv. 17 Kystriksveien Asp – Lødingen

• Troms – Fv. 7768 Tromvik–Henriksvik

• Finnmark – Fv. 8850 Hesseng–Nyrud

Alle kan stemme på vegen dei meiner er verst. Den dårlegaste vegen vert offentleggjord 8. oktober.

(©NPK)